EL SIELO DE SUKOT – Tomislav Osmanli

Ecrit par Sharope blanco le 7 mars, 2016

EL SIELO DE SUKOT

Tomislav Osmanli

Traducido dal inglez por Sharope blanco

 

El ayre de la primavera traye freskura i prokura bienestar.  Nina, en pies, kontempla el sielo de la tadre enkolgado ensima de los anchos kampos i respira kon ondos respiros.  El sol viene de undirse al horizonte basho, koloryado kon la meskla de kolores pastel de las nuvlas.

Ke diya es oy ?  De muevo se akodra de esta kestion ke mira de rechesar de su tino en konsentrando sus miradas al sielo mas aleskuro agora ensima de las luzes de las kandelabras ke van asyendyendosen….  Nina kontempla el firmamento asegurada de su dezeo de ver las luzizikas de las estreyas ke alumbran avagarito. otra vez, dospues ke pasaron tantos anyos de su chikes.  Es su manera de dirijar sus pensadas porke odya la noche.

Se estariya lementado por el diya ke paso ?  Ken save !  Lo ke es seguro es ke el diya ke paso se termino, i esto es siempre sierto !  Ke es esto ?  Una vale ?  Kampos fertiles ?  Nina trata de dirijar sus pensadas otra vez.  El ayre le traye la golor de la yerva ke la transporta en arrezvalandola a los tiempos pasados, sin ke eya lo kera…

Pensa ke « La Primavera es el tiempo del Amor »

Dejan se aserka lentamente ma tan serka de eya ke puede goler su kamiza kon la golar del basilicum freskamente kortado i ke su madre enkolga en el almaryo.  Estan detras del grande arvole en akel randevu a la salida de la eskola kuando un primer bezo la desha entera mareyada kon la savor i la golor de la yerva ke nunka aviya sintido antes.  Agora se topa kon los ojos serrados, sus lavios prontos por el bezo … Meneya la kavesa para liberarse de sus pensadas akseleradas ke la azen tremblar,  Trata de no pensar i solo mira al sielo estreyado ke ya se vistyo de su fostan nokturno i splendido.  No se rendyo kuento de kuando las estreyas aparesyeron.  Se perye en sus pensadas de muevo.  Los battimientos de su korasoniko se kalman avagar avagar kuando sus miradas kedan fiksadas a las luzizikas del firmamento.  Supito pensa a otra koza  :  El sielo de Sukot… I mi padre ?  Ande esta mi padre ?  Ke diya es oy ?  Desida ke el sielo asemeja enteramente a sielo del d’alkavo Sukot  i kon esto, se esfuersa a rechesar los penseryos ke siguen vinyendo…Sera muncho mijor de trayerse al tino la d’alkavo selebrasyon de Sukot, la fiesta de los Livros de Ley, kuando aviyan selebrado los kuarenta anyos durante loskuales los ijos de Israel eraron en el dezierto para yegar a las Tierras apprometidas.   Aviyan komido ocho diyas en la suka konstruida en la guerta, esta chika baraka, las paredes de lakuala se aziyan kon los ramos de los arvoles, sin techo, de manera ke se puediyan ver las estreyas en el sielo.  Esta vez aviya echo la suka ey-mizma, solika sin el ayudo de sus ermanos.  Antes la aparejavan todos enjuntos…  Vido la kara de su padre delantre de sus ojos.  No se asemejavan.  Era un hombre trankilo i robusto, kon la frente alta.  Yevava antojos i  sus miradas eran del vedre de la oliva o mas justo, de una kolor indeterminavle.   Las unas kuantas rigas en su frente no lo ayudavan a pareser mas mansevo porke teniya una larga barva i esto lo aziya asemejar a un Rabino malgrado ke era un simple shastre ke kuziya vistidos a la franka i era un membro respektavle de la komunitad de los komersantes.  Para eya, su autoritad era mas impozante del Rabino de la sivdad.  Lo keriya bien no solo porke era su padre ma porke dospues de la muerte de su madre ke okuryo antes kuatro anyos i sin ke se asperavan del todo, se aviya dedikado kompletamente a su ija i a sus dos ijos.  Nina lo amava porke sintiya ke el aziya todo su posivle para ke sus tres kreaturas no manken de nada i tengan una chikes i una manseves felis.  Tolerava las turbulensyas de sus ijos i mizmo kuando el mas chiko empeso de muevo a mojar su kama.   Trokava kon pasensya sus vistidos,  kon humor  i aziya riyir la kreatura kon espanto.  Kuanto a eya, la enkorajava de frekuentar amigos de su edad, salir afuera kon los de su klasa, dandelo moneda kada vez ke se iva a las reprezentasyones i al teatro i mizmo kuando su mijor amiga Rebecca le diziya ke se iriyan a baylar, se aziya del ke no saviya ande se estavan indo !  Lo amava porke les aviya deshado allegriya, yevandose las merikiyas i su soledad kon el a su botika, porke siempre la entendiya i le aziya saver  ke estava mekontento kon una sola mirada.  Lo amava porke le plaziya konversar kon eya sovre todo porke saviya a ke punto se eskarinyava de su madre.  Puediya ver  su sufrimiento kada vez kuando tratava de eskonderlo ma se le okuriya un sospiro ke se le fuyiva sin ke lo kera… En los d’alkavos tiempos Nina lo estava viendo preokupado.  Se estava assombrando, abattido de sus penseryos ke el solo konosiya… Estava de mas en mas ajitado, a vezes keryendo avlar muncho i mas anksiozo por seguro.

Es esto ke ve agora, kuando torna a kaza de ande Rebecca…. El hombre impozante esta asentado en la suka kon su espalda a la entrada, una gazeta delantre de el, meldando kon la luz flaka de la lampa de gaz a su lado alora ke las primeras estreyas aviyan empesado a briyar.  Absorbado en su lektura no oye los pasos de su ija.  Por la primera vez Nina lo ve envejesido.

–  Torni a kaza papa – le dize avagarikamente.

Moshe se torna un poko para darle la bienvinida i soriye.   Tiene la gazeta en las manos i avla al aver  :

–  Esto meldando esta gazeta i no me lo puedo kreyer !  Dingunos en el mundo se ambezo koza !  Se lo dishe al Rabino tambien !  La Tora se tiene ke de ser eskrita otra vez… I me mira entero atontesido!

De un lugar serka se oye la boz del ke avla a la radio.  Uno se esta riyendo afuerte  a la entrada de la puerta por detras.  Un otro esta tratando de kantar una kantika en Judeo-Espanyol.  El ayre dulse de los kortijos del vizindado traye la golor de las komidas kayintikas de la tadre.  Aya tambien selebran el d’alkavo diya de Sukot

–  No entyendo…  dize Nina soriyendo.

El kontinua a avlar…

 

 

–  No mos ambezimos nada del pasado !  Kuando meldo esto, lo de oy parese justo komo un livro de historyas konosidas

Moshe dubla la gazeta kon bruido i amata la lampa de gaz  :

–  Komo es posivle ke las personas tan kordialmente attados i tan serkanos vengan a ser  los mas negros enemigos ?  Tomo muestro por egzemplo.  Muestros ansestros  yegaron a los Pyreneos antes dos mil anyos i empesaron a avlar el Latino, el Espanyol i el Portuguez para ser persekutados por los mizmos Romanos, Espanyoles i Portuguezos. I malgrado esto dayinda avlamos sus linguas.

Nina trata de trokar de konversasyon…

– Ay novitades de Salonika ?  »

El kontinua…

-….i muestros ermanos de mizma relijyon, en Europa, ya ay siglos ke avlan en Aleman… »

Moshe no la esta oyendo..

–  …i mira.. agora los Alemanes los estan persekutando i los estan enserrando en los gettos..  I portanto son mas serkas de eyos ke de mozotros !  Esto no lo puedo entender.   Komo si los dertes de la vida ke aharvan las personas no abastavan, les kere apegar mas dertes ke inventa !  Vienen de pasar una mueva Ley :  En primero markaron lo ke los Judyos tienen i agora se los konfiskan.  No terminara este karnaval de lokura nunka  ?

–  Va pasar, papa, va pasar  – le dize Nina para kalmarlo.

Tiene un karakter blando i eya save ke se va kalmar.  Save ke kuando avla ansina es pormodo ke una koza lo esta komyendo por aryento.  Es su soledad, la mankura de su mama ke se siente en toda la kaza, espesyalmente en los diyas de fiesta familial.  Ademas en estos tiempos ke sus ermanos no se topavan en kaza pormodo ke se aviyan ido antes de un anyo allado de su tiyo en Salonika.  Teniyan el plano de yegar a las viejas tierras de los Judyos kon una nave ke se iva a Palestina, ayudados por la Tehiyat Israel, una de las organizasyones aktivas del Tsionizmo.  Moshe i Nina los ivan asperar, kudyando por la kaza i sus bienes, i si las kozas tornavan mal, se ivan ir allado de eyos de la mizma manera.

–  Kijyeras salir esta noche i irmos en vijita ?

En otras sirkunstensyas le  demanderiya si kijyera  ir  al sinema ma en estos diyas mijor valiya no toparse en las plasas i lugares publikos.

-Kuando todo esto va pasar ?

Moshe no la esta oyendo  i esta komo keshandose a alguno detras de eya…

–  Ande va eskapar ?  Aya ?  Aki ? O en Palestina, ande tus ermanos i tu tiyo deviyan partir o ya estariyan aya ?  Mozotros i los Palestinyanos tenemos las mizmas raises  kon esto mos odyimos durante siglos… Mil anyos de odyo.  Las personas biven aya, eyos i mozotros, i no diran ni un « buenas diyas »  los unos a los otros .

–  Desha esto..

Nina arroga su padre.

–  … i saves komo se dize buenos diyas’  aya ?

Moshe no la esta oyendo.

–   Shalom aleihem,  es esto lo ke los muestros dizen.  Selam aleikum es lo ke los Moros dizen.  Tiene la mizma signifikasyon.  Mozotros dizimos ‘Buenas noches’  i los ke kon ken bivimos enjuntos en Alemanya i en Hollanda dizen  ‘Gutenacht’  i  ‘GoedeNacht’.   ‘Gutenacht – ma dingunos pueden durmir.   Dizen  ‘Shalom’  ma dingunos tienen paz .

–  Te trayi unas kozikas de komer…

Nina kita unos pedasikos de un gato kon miel ke le aviyan ofresido ande una amiga.

–  No tengo ganas de komer ijika ,

–  Son dulses i te plaze kozas dulses

–  Kero yorar, tengo lagrimas… Es muy duro.

–  Te rogo papa!  Pensa en kozas buenas.  Pensas ke es fasil para mi ? Penso en kozas ermozas.. Si !

–  Te akodras, Nina, komo dekoravamos la Suka en esta fiesta ?  Tu i tu madre, tus ermanos, todos enjuntos kon alegriya ? Komiyamos a midi i por la noche en muestra Suka la semana entera asigun la tradisyon.  I al sieten diya de Sukot, en Hoshana Raba, me iva a la Sinagoga para estar kon los otros and yennos de esperansa meneyavamos los ramos de saule (mimbre- sogut-willow) tornando al deredor de la teva i gritando Hoshana!  Salvamos !  Oh Salvamos !  Dospues komiyamos una koza dulse.  Las dulsuryas teniyan savor en akel tiempo.. Te akodras Nina ?

Moshe la estava mirando kon kuaji dezespero.

– Un punto papa… Kalmate…!  – en kudyado agora trata de kalmarlo.  Moshe tiene su boz empanyada i trata de aklarar su garon kuando dize

– Me esto esfuersando de pensar en kozas ermozas… Ma, esto esta rendyendo mi pena mas insuportavle.

– Alora no penses.  Las memoryas te endjidan….

Puediya siempre kalmarlo i trokar sus penseryos porke era una maestra en esto. Los suyos i las suyas tambien.

–  No me esto akodrando… No !

Moshe se esta  balansando komo kuando aze sus orasyones de la demanyana en la Sinagoga.

–  Me esto demandando si muestros parientes izyeron sus Sukas este anyo i ande ?  En Salonika o en Israel ?   Si estan dayinda aki, estan mirando a las mizmas estreyas.  Si tus ermanos konstruyeron una Suka, deven estar aryento agora.  Estariyan komyendo i bevyendo i jugando eskondidas.. I puedeser estan pensando en mozotros…

Nina tambien aviya jugado eskondidas en la Suka.  Riyiyan komo lokos.  La mama les traiya dulse de mansana.   La golor se sintiya de leshos…  Sus papa riyiva i inchiya su vazo de vino.  « El vino es kasher ? »  le demandariya la madre eskudyandole el dulse en el plato enfrente de el.  Lo mirariya soriyendo i, alora, el kitariya los muevos kostumes ke aviya kuzido por los ijikos  en los diyas antes de la fiesta.  No dariyan atensyon a los regalos okupados a koryer en el kortijo.   La madre tratariya de kalmarlos en vaziyo !   Sus rizas i sus gritos de alegriya bolariyan mas aya de las paredes, oyendosen de los otros kortijos.  Aviyan  embiyado sus ermanos  a Salonika antes mezes.  Su padre le aviya kontado ke aya estariyan en seguritad i puedriyan viajar mas leshos, a un lugar mas seguro.     Se los aviyan yevado a la estasyon del treno i aviyan asuvido enjuntos kon eyos al kompartimanto  de tresera klasa yenno enteramente de manera ke no traven muncho la attensyon.  Se ivan ir ande sus tiyo kon dos merkadores deskonosidos ke eran amigos del tiyo.  Moshe aviya kuzido kon kustura estrecha diez liras de oro a los bodres del  palto de kada ijo. No se viya nada mirando de afuera.  El tiyo ke teniya un studyo de fotografiya en Salonika era un hombre bivo, kon energiya i puediya ver mas aya ke las personas de su familya i la familya de su mujer.

Akeya noche, Moshe i Nina no puedyeron durmir dospues ke los ijos partyeron.  Nina oyiva los ondos sospiros de su padre en la kamareta del lado.  Dospues sus pasos detras de la puerta serrada.  De debasho se viya la luz dezrepozada i la solombra de la lampa de gaz ke sus manos deteniyan.  Nina saviya ke se iva ir a la kamareta de sus ermanos en azyendo  muncha attension para no azer bruido kon su puerpo massivo.  Mirariya sus kamas vaziyas para konvenserse ke los mansevos ke aviya  embiyado la demanyana no estavan en sus kamas de vedra komo kada noche fina akel diya.

Dospues de dos diyas les yego un telegram informandoles ke los ijos aviyan yegado a Salonika.  Estavan kontentos i les embiyavan bezos.  Los suyos los aseguravan ke no tendriyan dingun problem  i ke todos estariyan bien.  Kon esto, se eskondiya detras de las linyas del telegram un misteryo, komo un message aleskuro.  Un segundo viaje se anunsyava entre las linyas… A Palestina, a las tierras de sus ansestros, a Eretz Israel.  Oh Hoshana !  I de agora en delantre Nina saviya ke su padre no puedriya durmir las noches, dando bueltas en kaza, justo komo la primera noche dospues de la ida de los mansevos, komo si savyera ke Moshe aviya peryido su esuenyo.  Estariya kon los ojos avyertos al deredor de las kamas vaziyas de sus ijos i lo mas, serka de su propria kama ande kayeriya muerta kansada, sin pueder durmir, antes de serrar sus ojos por fin.

–  Estan, Padre……

Nina le responde dospues de un  largo tiempo, tomando una siya i asentandose a su lado en la Suka.

–  Mos tienen en tino i estan mirando al sielo.  Estan riyendo i estan nuy horozos kon el tiyo i muestros otros paryentes.  Mos estan nombrando..

–  Ken save….Ken save si estan allegres… Pensas ke se ven las mizmas estreyas en el sielo de Israel ?  Puedeser ke se ven otras tambien ?

–  Las mizmas por seguro !  Mira kuantas estreyas aklaran  el sielo esta noche !.  Komo si el Todo Poderozo aviya asyendido el mas grande kandelabro para la fiesta.  Para ti, para mi.  Para los muestros aya.   Mos esta dando a todos un sinyo !  Esta asyendyendo las estreyas para darmos a entender ke no estamos solikos.

Moshe le echa miradas….

–  Ma estamos solos, mi kerida

–  Mos esta paresyendo solo ansina….Kreyeme..

–  No me viene de aryento de kreyerme mas….

–  Kreyete !  Mira !  Komo una negra koza puede afitar dospues de una noche tan gloryoza komo esta ?

Nina abrasa su padre. Siente sus ombros tremblando.  Lo mira en los ojos.  Estan sekos.  Es solo su puerpo ke trembla.  Se abolta a eya, keryendo dizor koza.  Es Nina ke avla.

–  Hag sameah !  Fiestas allegres papa.   Sukot allegre !    I ke al otro anyo, seyamos todos aunados en una Suka debasho de las estreyas  !

Lo abrasa en sus dos karas i siente su sudor.  Pensa   » Devo lavar su kamiza ! ».  Mirando de serka, ve una chika mancha en su vistido.  « Devo de alimpyar su vistido tambien ! »   Nina aprova de alimpyar la mancha ma se rende kuento ke no es una mancha… Son las kusturas de la Estreya de David ke todos deviyan meter basho del orden del muevo regime….  Moshe la mira i soriya amargamente.

–  Esta mancha no va dezapareser

Nina keda mirando…. Su pensada es aleskura komo esta estranya syetena noche de Sukot.  Oh Hoshana !   Ma eya es maestra !  Save trokar sus pensamientos !  Se akodra del piknik ke izyeron kon Dejan.  La kayntor de su soriza, sus dientes blankas blankas i del bezo ke le aviya arrovado !  Le murmura :

–  Dajen, me amas ?

–  Mi nombre es Dejan !- le dize i la kere abrasar de muevo.

–  No es importante i se desha abrasar…. Tiene la savor del timo (tomillo- thyme)  salvaje, de la planta del amor ke viene de enfloreser. Ande esta mi padre ?  Ke diya es oy ?  Los pensamientos le tornan por la diezena vez…  Estan chuflando….. Perros estan ladrando (gritando) no leshos de ayi.  I los bruidos dezaparesen.  El ayre traye la primera freskura de la tadre.  Nina siente yelor.  Se kuvija la kavesa.  De leshos oye una kantika triste.   Pasa su mano sovre su kavesa muevamente razada.   Abasha su braso.  Tiene ensima el tatuaje de un numero ke vinyeron de azerle….  I en sus ojos el espanto.   I las estreyas.  Komo akeya npche de Sukot.   Ke diya es oy ?   Sus ermanikos yegariyan a Israel ?   Ande esta su padre ?   Esta serka.  Nina se akodra de las barakas de los hombres, unos sienes de metros mas aya.    Estariya konsiente, Moshe, ke se topa en esta parte del kampo de la muerte o kayo durmido profundamente, tormentado por sus pensamientos i el terror de lo ke lo estava komiendo i les afito por fin ?   Estariya pensando ke la Tora entera devriya ser eskrita de muevo o si solo un muevo kapitulo insierto devriya ser inkorporado ?   Oh Hoshana  !   Porke este lugar se yama Treblinka ?   Dezeya ver la kara de Dejan enfrente de sus ojos.  Su respirasyon, el dulse abraso, el primer bezo.  Es maestra de trokar sus pensamientos.  Ma la realitad brutala le viene supito al tino.  Oy es el 30 de Marzo, 1943.  Es la noche estranya i terrifika de Sukot ke empeso supito  kon las estreyas ke menasavan  en el firmamento oskuro …..  Preto komo absorbado en el  oseano del preto ke los arrodeyava  i tan pezgado ke le paresiya ke estava travando el firmamento entero abasho i estava para englutir el mundo entero… Oh Hoshana !

Tomislav Osmanli

Traducido dal inglez por
Sharope blanco

7Mar

Comments are closed.