Accueil - sefarad.org
 
Coya Delevi

Datas istorikas... datas importantes

    MENU    

SEFARAD.org
[L'espace de Coya Delevi]
AIDEZ-nous
Page PRECEDENTE

DATAS İSTORİKAS… DATAS İMPORTANTES

Coya Delevi

La Sigunda Gerra Mundial kontinuando kon toda su orror... Grupos de djudios del Este de la Evropa, bushkando remedyos, kaminos para pueder fuyir del ginnam Nazisto. Para los ke fuyiyan kon naves, Estambol era el itineraryo preferido, la puerta avyendose a la esperansa, de la Mar Marmara a la Mediterranea.

“Struma” achakes de la trajika estorya ke evoka, fue la mas konosida de estas naves de esperansa...Tambien, se avlo i se espekulo bastante achakes del misteryo ke konservo durante un largo tyempo. Uvo diversas teoriyas sovre su fin trajika por una terrivle eksplozyon en el 24 del Febrero 1942.

Oy, no kedo dingun misteryo i sekreto sovre la undisyon de la nave. Ma, es enteresante i un poko triste asigun mi, remarki ke oy en diya ay personas ke no konosen egzaktamante el responsavle de esta trajediya o lo konosen yerrado.

“Struma” era una ruvina de nave, rekuperada del fondo del Danubyo…Fue konstruida para el trafiko de rio, i no para mares altas. En desparte, reparada vezes i vezes. Ma, esto no teniya dinguna importansa para la adjensya organizatora “Tourisme Mondial”, en realidad oportunistos dezeozos de kitar profito materyal de la fuyida dezesperada de los djudios ke no fueron permetidos de ver la nave antes de la partensya. İ kuando los malorozos fujitivos la vyeron en un estado deploravle, ya no aviya nada ke azer..

Struma, en el 12 del Desembre 1941 partyo de Constanza kon 790 personas inkluendo i el personel. Los viyajadores eran djudios fuyendo de la Rumaniya antisemita i de la orror nazista. Sus buto era de ir a la Palestina. En el 15 de Desembre, la nave vinyendo de la Mar Preta, entro al Bosfor, ankoro delantre Sarayburnu asta el 24 del Febrero 1942, no teniendo la permisyon de kontinuar verso la Mar Aegea. Uvo negosyasyones interminavles. Sin asperar el rezultado, la nave tomo el orden de abandonar Sarayburnu. Traverso de muevo el Bosfor, el 24 Febrero fue abandonada a la Mar Preta, a su trajiko destino...

Asigun manaderos, myentres las negosyasyones syertos, posesores de vizas palestinyanas, fueron permetidos de kontinuar el viyaje por tyerra. İ kon la intervensyon i ayudo de personajes importantes de Estambol, un chiko shifro de viyajadores reusheron a salir del vapor, ansi ke Medea Salamonovitch ke estava para parir.

Ya se ke este teksto miyo no tiene entonses dinguna valor de “novela”. En estos diyas ke estamos en el 73. anyo de la trajediya, mi eskopo es komemorar i no OLVİDAR. Azardo estranyo, esto meldando el livro de poemas del Prof. Moshe Liba, sus rekuerdos de la Shoa de Rumaniya. “ESTO REKLAMANDO” , tresladado al Judeo-Espanyol por muestra amiga Zelda Ovadia en kollaborasyon kon el autor.

Yo meldi, ize bushkidades, eskrivi Sovre la Shoa i me imajini ke ya saviya bastante sovre el sujeto. Grande yerro!. Kale meldar el livro del Prof. Liba, para pueder realizar asta kel grado de atrosidades, de sataneriya puede ir la krueldad umana. Me tomo munchos diyas para meldar este livriko de 125 pajinas. Meldi diya por diya, solo 7-8 ojas. Porke me estava azyendo mal al korason este aspekto de la Shoa ke no konosiya asta oy…

Otra data istorika:27 Enero 1945: Liberasyon de Auschwitz, Kampo de la Muerte.

Terminaremos kon los versos final de la poezia eskrita por muestro regretado amigo Elie Perahya “A la memorya de 1.500.000 kriaturas matados por los nazis.

Se seraron las orejas
Para no oyir,
Los ojos,para no ver,
Y los korasones
Para no sintir.
Ma del fondo del abizmo
Miles de bozes
En la eskuridad
Gritan sus nombres
Para nunka olvidarlos.

- Copyright © sefarad.org - 1997 - 2016

CONTACT

Retour au site sefarad.org -