Accueil - sefarad.org
 
Coya Delevi

Entrar en anyos o envejeser ?

    MENU    

SEFARAD.org
[L'espace de Coya Delevi]
AIDEZ-nous
Page PRECEDENTE

ENTRAR en ANYOS o ENVEJESER?...

El diya ke se va publikar el No. de “El Amaneser” ke estash meldando en este momento, va tener una partikolaridad para mi. Es el diya ke esto eskapando mis tres kuartos de un Siglo. En kurto esto kompletando mis setenta i sinko anyos.Un aniversaryo espesyal, ke dizish?!.. Fue un poko por esta okazyon ke pensi de azer este artikolo sovre la vida i los anyos, ke ESTO DEDIKANDO A MIS KERIDOS IJOS I IETOS.

En pasadas myentres una konversasyon entre amigas, se pozo una pregunta : “Asigun vozotros, en el Universo kualo puede ser el evenimyento tenyendo una grande fuersa destruktiva?” Ken disho la bomba atomika, ken la rash (seismo), ken esto, ken akeyo... A la fin una amiga pretendyo aver meldado ke dinguno de estos achakes pude ser kavza de destruksyon al grado del danyo ke mos azen los anyos, el tyempo ke pasa, en kurto la “Edad”. Siguro ke i esto es un punto de vista. El komentaryo lo desho a los lektores...

Ya es verdad ke en el korso de los anyos mos estamos desvelopando seya fizikamente, seya mentalmente. Mos estamos engrandesyendo i estamos ganando konosensyas, eksperyensas, ansi ke sezudeza. Ma, d’otra parte, los anyos, el tyempo avagar, avagar estan azyendo sus lavoros de destruksyon. Kuando, sovre las selulas del organizmo, kuando sovre las fonksyones del meoyo. Esta kansando el korason o otros organos. Esto es una realidad. Naturalmente es imposivle de detener el tyempo ke pasa. Lo ke vyene a dezir ke, lojikamente no puedemos kedar mansevos. Ma, biyolojikamente ya puedemos. Keridos lektores, me esto rendyendo kuento ke empleyi byervos “pompozos”, ma no topi otra manera de eksprimir mi idea. Kije dezir, en la mezura del posivle, puedemos konservar muestra sanedad fizika i mental. Aki kreo ke todos estamos d’akordo: antes de todo la salud... No penso dar konsejos sovre las maneras de konservarla. Ya devesh saverlo todos!.. Yo personalmente, en la luz de lo ke esto kontinuando a bivir desde dos mezes, esto en pozisyon de pueder insistir sovre la valor de la salud.

Alora, si estamos achetando la realidad ke ekspozi, devemos byen emplear kada diya de muestra vida, afilu kada momento. Devemos valorizarlos i profitar de eyos. Ke manera? Es un poko difisil de dar una kurta repuesta. Solamente vo sitar un proverbo Ekosezo ke en un sensyo, syempre fue komo mi dotrina :”Las personas pensan ke en bivyendo se envejesen. Ma, es en NO bivyendo ke se azen vyejos...” Ay muncho de komentar sovre esta dicha, ke dizish?... Yo lo ize a mi modo, i esto kontente. A vozotros keridos amigos, de kitar una lisyon de estos byervos!...

Asigun dishimos, es imposivle de impedir la “fuida” de los anyos. Ma los puedemos arresivir, achetarlos kon amor, kon kerensya, kon muevas esperansas. Esto mos va dar la satisfaksyon de kedar mansevos a lo menos en los sentimyentos i en la forma de pensar i de konsever la vida. Las personas ke saven kerer, ke saven partajar kon amistad, ke syempre tyenen esperansas en sus korasones, kedan mansevos. Partajar los rekuerdos, las emosyones, las alegriyas ansi ke las penas... Lo mas importante, partajar las eksperyensas ke ganamos en el korso de los anyos.

Oy los mansevos, kero dezir muestros ijos, inyetos, grasyas a la teknolojiya, pueden alkansar a todo modo de informasyon. Ma esto nunka sera igual a las eksperyensas de los aedados, a las lisyones ke se toma de los yerros en kada etapa de muestra egzistensya. Egzaktamente komo dize la kantika (mi preferada!) : “I know what it is to be young, but you don’t know what it is to be old...” “ Yo ya se lo ke es ser mansevo, ma tu no saves kualo es ser aedado...” Otruna ermoza fraza ekspresando un mundo de kozas...

Envejeser... Entrar en anyos, bivirlos, ma ke manera? Travarte a un kanton, kon el preteksto ke entonses no sos mansevo? O dezir komo ekskuza: “Ya paso de mi, a esta edad kualo puedo azer?!!”. Si estas en buena salud, la vejes no deve ser un preteksto, para estar inaktivo. A lo menos un “hobby” afilu, puede ser el byenvenido en los anyos maturos de retreta. Komo lo remarkariyash keridos amigos, no dishe anyos de vejes, ma de retreta. Porke yo penso ke seya la manseves, seya la vejes son nosyones relativas.

Son unikamente nosyones ke se pueden komentar de diversos modos. Ay mansevos de 45-50 ke se syenten aedados. Par kontra ay otros ke kontinuan a ser aktivos de una manera o otra, mizmo a los 70-80. Estos anyos d’alkavo tuve la shans i la onor de konoser nombrozos de estas personas. Tuve la felisidad de konoser de serka a syertos ke konosiya solo de nombre, a traverso sus lavoros o eskritas.

Kualo es manseves? Ande ampesa la vejes? No egziste dinguna baryera fizika de distinksyon entre estos dos estados de la vida del ombre. Es la mentalidad de la persona ke djuga rolo. La persona es manseva, kontinua a serlo en la mezura de sus aspirasyones, su koraje a realizar sus esperansas, su perseverensya a kompletar sus proyektos. En kurto, del momento ke dechido de konsiderarse komo aedado, de no tener dingun buto en la vida efektivamente, ya ES AEDADO!...

Ya se ke ay amigos, amigas de mi edad ke pensan komo mi. Semos esparzidos en las kuatro puntas del mundo. Mos konosemos unos, o no mos konosemos. Ke importa? Basta ke sepamos ke tenemos el mizmo buto, ke estamos azyendo muestro posivle para reushir, kon el amor de muestra Lingua i Kultura. Estamos perkurando a konservarlas i desharlas a muestros inyetos... Aki devo admeter ke en esta lucha, orozamente no semos solos. Estamos ombro kon ombro, djuntos kon los mansevos tambyen. Tengo la esperansa ke eyos, ansi ke syertos de las futuras jenerasyones van a kontinuar a luchar. Mi grande dezeo es ke no kede solo en esperansa, ma ke se transforme en konviksyon i... aksiyon...

No ay edad para ambezar, ganar muevas konosensyas. Puede ser semos de una syerta edad. Atansyon! no dishe vyejos, si mizmo mos kalifikan de “Dinozor”!! A mi no me aze ni friyo ni kalor la manera ke mos yaman. Si ser aedados sinyifika tener una relasyon kon la data de nasimyento eskrita en muestra karta de identitad, no tyene dinguna importansa para mozotros. Porke tenemos el privilejyo de posedar presyozos rekuerdos, eksperyensas de vida adjuntados kon una grande tolerensya.

- Copyright © sefarad.org - 1997 - 2016

CONTACT

Retour au site sefarad.org -