Accueil - sefarad.org
 
Coya Delevi

Un kuento

    MENU    

SEFARAD.org
[L'espace de Coya Delevi]
AIDEZ-nous
Page PRECEDENTE

…Aki mos gusta de ser en chikos grupos, munchos grupos i mas grupos. En realidad, esto es el imajen de la “Demarsha Talmudika”:partir de lo simple para arrivar a lo komplikado. Porke nada es simple. Kada aspekto de una realidad es kompuesto de nombrozas fachetas. Mizmo si en vezes son kontradiktaryas, sinyifikan la “Sezudeza Divina”ke no tiene fin”.

UN KUENTO...

Coya Delevi

Meldatesh un pasaje del livro “Estudyo del Talmud” ke antes unos, kuantos anyos en mi pajina de “El Amaneser” aviya dado el treslado rezumado. Ý aviyamos demandado una pregunta semejante: “ En kualo el Talmud es diferente de todos los otros livros?”. Mos estamos ambezando ke antes de todo es una eksperiensa de la vida. Para pueder bien entender su kontenido kale djuzgar en partyendo de lo simple para arrivar a lo komplikado. Porke la realidad tyene en vezes nombrozos aspektos. Keridos amigos, aki vos kero prezentar una konseja, un kuento de manadero anonimo. Reelmente no me esto akodrando si tengo empleado este teksto en estas pajinas. En tresladandolo del fransez, perkuri a no pyedrer su efikachidad orijinal. Esta komo un tipiko egzempyo de la “Demarsha Talmudika” ke se estava tratanto en el sovredicho livro...Aki tenesh el kuento:

“A la fin de nombrozas negosyasyones kon las otoridades lokal, un savyo Djudio, un Talmudisto de Odessa reusho a obtener la otorizasyon de vijitar Moskova. Suve al treno i se asenta en un lugar vaziyo. A la estasyon sigiente entra. un mansevo i se instala djusto al lado del Talmudisto, del savyo aedado. El nikochiri todo en observando el mansevo, se mete a pensar: “ Este mansevo no tiene la aparensya de ser un kazalino. Dunke, si no es un kazalino deve probavlemente bivir en este dristikto. I si es de este distrikto, deve ser siguramente Djudio, porke aki es absolutamente un distrikto Djudio... Ma, de otra parte, supozando ke es djudio, ande puede irse este mansevo? Porke yo so el uniko Djudio de este distrikto, ke reusho a tomar la permisyon de ir a Moskova...
“Ah, atansyon! En la banliyo serkana, antes de Moskova, ay un kazaliko ke se yama Samvet. Es el uniko kazal ande los djudios no tyenen menester de “laisser passer”. Ma, deke este mansevo va viajar asta Samvet? Sin duda, para vijitar una de las famiyas djudias de ayi. Veremos un poko... kuantas famiyas djudias biven en Samvet?.. Ah, solamente dos: los Bernstein i los Steinberg. Ma komo los Bernstein son antipatikos, este buen mansevo esta sin duda indo a vijitar los Steinberg...
“Ma, porke este mansevo va ir a vijitar los Steinberg a Samvet? Eyos tyenen solo dos ijas. Dunke este mansevo es probablemente yerno de los Steinberg. Ma alora, kon kuala de las dos ijas es kazado? Ya savemos todos ke Sarah Steinberg kazo kon un buen avokato de udapest myentres ke su ermana Ester tomo un merkader de Zhitomer. Dunke el mansevo deve ser el marido de Sarah. Esto kere dezir ke se yama Aleksandr Cohen si no me yerro...
“Alora, si vyene de Budapest, kon este todo antisemitismo de ayi, se trokariya el nombre… Kualo es el ekivalente de Cohen?.. Es Kovacs. Ma si ayi, en Budapest achetaron ke troke el nombre, este mansevo deve tener un estatuto espesyal para pueder azer esto... Ah!... esto siguro, deve posedar un doktora de la Universidad... Mas de esto, nada es posivle”.
Despues de djuzgar i arrivar a esta konkluzyon, el savyo Talmudisto se abolta verso el mansevo i le demanda: “ Muncho pardon Dr. Kovacs puedo avrir un poko la ventana?
“Siguro”, responde el mansevo bastante sorprendido. Ma, komo konosej mi nombre?”
“Bof !”, responde el Talmudisto, “ Esta tan evidente!!”...

- Copyright © sefarad.org - 1997 - 2016

CONTACT

Retour au site sefarad.org -