Aaron Hugno, por Violette Fintz

Bive aki un ijo Joseph i profiti de demandarle por el padre, mi dio una tchica foto ke la engrandesi i li esto mandando i la negativa. Aaron Ben Moche Hugnu, era un ombre ke quaji todos los Rhodeslis si rikordan de el.

El non touvo yido a eskolas grandes ni estudio medecina ma loke iso en Rhodes surpasso el mas grande Dr. ke teniamos estonses Gallina.

Joseph mi konto : El ermano Aaron su padre, quando era giovane, accompagnava el Dr. Turiel i le tenia la tchanta. Dr. Turiel era muncho rinomado en Rhodes, dunque el ermano Aaron illa kon el Dr.
a vijitar alo hasinos i era interessado de ver todo loke asia.

Quando Dr. Turiel morio el ermano Aaron si iso famoso circonsidor, i si applico a curar rotturas de guesos. El non tomava paga al kontrario si avia uno ke tenia minister li dava ayudo.

Mi conto Joseph ke el gortelano del Governador Mario Lago si rompio el pič, el ermano Aaron si lo curo mismo despues ke este gortelano avia vijitado otros doctores sin rimedio.

Despues de poco tiempo El Governador el mismo si rompio el brasso i Prof. Gallina ke lo cudiava non estava riucendo a milisinarlo, allora el gortelano li dicho al Governador "Yo conosco un judio
ke mi curo el pič mio" allora lo yamaron al ermano Aaron i despues de unas quantas vijitas parvino a milisinar el Governador.

Allora el Governador Lago li demando de pagarle ma el dicho ke el non toma paras i ke lo ase todo por humanidad. Solo el ermano Aaron li demando ke isiera legal esto ke asia, ma el Governador
li dicho ka malorosamente era impossible siendo non tenia un diploma.

Mismo Gallina approcho el ermano Aaron ile demando en ke Universidad estudio i quando sintio ke non fue all'Universidad si impressiono muncho i li rogo ke keria estar presente quando
fissava una de estas roturas.

El ermano Aaron era nasido en Rhodes, kasado i tenia 4 ijos i 6 ijas. El morio ala edad de 80 agnos viajando para irse onde su ija al Sud America, el estava accompagnado de su mojer. Fue interrado en Genova. Solo kero desir ke quando el ermano Aaron touvo el primer ijo, despues de 6 ijas, el Dr. Turiel lo incorajo a circonsir su prorio ijo i ansi fue ke kontinuo.

Retour au sommaire



- Copyright © 1993 Moïse Rahmani - Institut Sépharade Européen