POESIE

EL ENDIVINO

Sara Yohay (1992)

La ninya se hue al endivino
I le yevo un bokal de vino.
Kijo ke le diga del amado
Si la kere poko o demaziado.

El vio la djoven de ojos vedres,
Le disho : Tus anyos tu piedres.
El kazado esta kon otra.
Si lo ves tu kamino abolta.
Yo konsejos buenos te dare,
I mis brasos te avrire.

Se levanto la ninya ermoza,
No kijo entender la koza.
Al kamino al kirido enkontro,
I kon sus ojos vedres lo miro.

El avrio los brasos i la bezo;
Eya le disho lo ke se ambezo.
Es verda lo ke le disho el endivino?
Al kirido a huerte le vino.

Luz mia, amor de mi amor,
Alma de mi alma, ke orror!
El Satan separarmos keria.
I yo sin ti me muriria.

Dezgrasiado endivino i selozo,
Fazerse por todo poderozo!
Sus dichos palavras de fiel!
Te kijo obesediente an el,
Esklava suya para tenerte,
I ansina a la muerte traerte.

La ninya se kazo kon su kirido,
I nunka uvo d'el mijor marido.
I si keresh saver del endivino,
Patladeo beviendose el vino.

Retour au sommaire



- Copyright © 1993 Moïse Rahmani - Institut Sépharade Européen