ULTIMA ARGUMENTASION DJUDIA

 

 

 

(Tomado del livro famoso « El dekreto de Alhambra », por Sr David Rafael, i tradusido del englez a la lengua de akontesimiento por mano de Eliezer Papo).

 

 

El grande inkvisidor, Toma Torkvemada, estava alado de la reina. En su kara se podian ver triumfo i satifaksion. La reina paresia al kontraparte umano del mizmo edikto, kruela i sin piedad. Asentado a su derecha estava Fernando, friyo i indiferente. Dezemosiando el adirisho dos kortieros djudios ke fueron enfrente de el : « Siendo ke vos dos sosh kaveseras de la Djuderia estoy siguro ke tenesh de dizir algo en esta koza. Uno de vozotros tendra lisensia de avlar libre, por ultima vez. Sin restriksiones o limitasiones. Esto sera la unika argumentasion ke la eskucharemos, i despues esta se va a  serar. Ken de vozotros lo kere azer ? »

Senyor lo mirava a Abravanel. « Yishak ke avles tu. Yo, ke podia azer detras de la scena, lo izi. Non ay nada mas ke lo pueda azer yo. Agora es tu momento, Yishak, avla por mosotros todos ».

 

Antes de ke el Abravanel tenia oportunidad de responder, Senyor se abolto presto  al rey i a la reina proklamando en boz alta: “Vuestras Eminensias Don Yishak Abravanel avlara en nombre de todas ayamas djudias de Espanya”.

 

Sin dizir algo mas Senyor se asento en una de las siyas de atras, saliendo asi de la vista publika. Todos los ojos eran sovre el Abravanel. El governador djudio se abolto a sus audiensia. Sus ojos penteraron a sus kontrapartidarios. Furiozo, kon la barva, paresia a un profeta verdadero.

 

El Abravanel avryo i empeso : « Vuestras Eminensias ! Don Avra’am Senyor i y vos agrademos por esta oportunidad de dizir ultima koza en su nombre de las komunidades judias ke las reprezantamos. Kontes, grofes i markizes del korte, kavalyeros i senyores…

Esto una onor grando kvando el Djidio tiene de rogar por seguridad de se puevlo. Ma, es mas grande virguensa kvando el rey i la reina de Kastilya i Aragon, de intera Espanya, tienen de bushkar su gloria en la expulsion del puevlo inofensivo ».

 

Se eskucharon gritos : « Las insultas por el rey i por la reina non tienen un kavo ? Digo… Basta ! Por afuera kon estos maldichos Djidios”.

 

Don Yishak Abravanel se abolto furiozamente a las karas de los suverenes. Kon ojos aviertos I yenos de furiozidad i inkandesensia se adirisho al rey I reina mirando los kon ravya. Don Yishak informo a los governadores kon una boz yelada: “Non somporare interupsiones. Tengo o no la libertad komplida de dizir loke kero?” Isabela le arispondio kon menospresion : « Vos puede dizir loke kere, Don Yishak, si pensa ke esta va a azer alguna diferensia ».

 

Fernado le disho a Abravanel : « I vos, Don Yishak Abravanel, ke akave loke tiene de dizir ». Don Yishak Abravanel sintyo nueva fuersa entrando en su kuerpo. Nuevotopada fuersa le tomo por intero dandole una emosion de inosensia djusta. Komo el leon de djungla, komo el profeta indomable se sintia mas ke una kontienda para kon sus oponontes. Aparejando se por la gera verbal el preparo a su avla komo la onda de palavras por matar lo  al Golyat espanyol. Abravanel avryo i disho : « Lo topo muy difisil por entender komo kada ombre Djidio, kada mujer i kada kriatura pueden ser un peligro por la iglesha katolika. Akuzasione smuy muy fuertes. Los Djidios estan destruiendo al kristanizmo ».

 

Es ke esta totalmente opozito. Vos mizmos non admitistesh en este edikto mizmo ke mos metistesh en kvartos restriktos, i ke mos limitastesh las privilegiones legales i sosiales- non a mentar ke mos forsastesh de vestir vistidos de virguensa ? Non mos terorastesh diamente i nochamente kon vuestra inkvizision diabolika ? Deshad me explikar esta koza a todos los prezentes : es ke non deshare la boz de Yisrael ke  seya abatida en el diya el este.

 

Eskuchad los sielos i avrad la ureja rey i reina de Espanya, porke so yo, Don Yishak Abravanel, ke vos avlo. I mis antepasados son desiedentes direktos de David ‘aMeleh. La sangre royal verdadera, la sangre de Mashiah pasa en mis lavyos. Esto es mi eridensia, i lo proklamo agora en su nombre del Dio de Yisrael, en nombre de mi puevlo, puevlo de Israel, eskojidos del Dio. Yo los proklamo djustoss i inosientes de todos los krimenes enmentados en este edikto abominado. La krimen, la transgresion es para vozotros ke la yevash – i non por mozotros. El dekreto indjusto ke lo proklamastesh oy vuestra kayida sera i non muestra. Este anyo ke tenia de ser anyo de la grandisima gloria de la Espanya sera el anyo de su grandisima virguensa. Komo ke la onor esta kontrapizada a virtudes individuales , ansi tambien la rasa umana expekta  de los reyes i reinas inklinasion para la nobilidad i aktos enaltesidos. Kvando una persona aze kozas abominables su reputasion sufre. I ansi tambien kvando los reyes i las reinas azen kozas virguensozas si azen danyo a sus mizmos. Komo ke esta dicho : mas grande la persona ke yera – el yero mas grande. Yeros si los veyin del timprano dayinda se pueden korektar. La pidera del fondamiento ke yeva a la konstruksion dayinda se puede reinstalar a su prozisyon. Ansi tambien la proklamasyon yerada si se entiende su yero en tiempo se puede enderechar. Ma es ke el zelotizmo relijiozo menospriyo la razon i el konsejo dezorientado pervertyo al djuisiyo. El yero edikto presto sera irevesible komo i el akto ke lo proklama.

 

Si! Mi rey I mi reina eskuchad me bueno, yero, vuestro yero profonde I irreversible, yero pizgado komo ke la Espanya non vido de antes. I vos solos sosh responsables. Komo ke la arma amostra la fuersa de la nasiyon, ansi las artes i la literatura mizuran sus senzabilidades rafinadas. Si ! Vozotros ganastesh i konkvitatesh al infidel muzolmano kon la fuersa armada amostrando vos ansi grandes en la arte de la gera. Ma, loke kon el estado de vuestro mioyo ?

 

Kon kval derecho se van vuestros inkvizitores por intera Espanya kemando en miles los livros en okedes i auto dafees. Kon ke autoridad vuestros frates keren agora kemar la biblioteka maravioza de este palasiyo maurisko i destruir sus livros presyados ? Segun kval derecho? Porke ? Kon ke autoridad ? Es kon vuestra autoridad mi rey i mi reina ? En la sprofunduras de vuestro korason vos menoskreyesh la poder de la sensia respektando solo a la poder diznuda.

 

Kon mosotros Djidios esta totalmente opozito. Diferente. Mosotros dezde siempre kordialmente presiavamos el saver. E, kazas muestras i en muestras sinagogas siempre se estudia. Estudio para mozotros ez ei propozito de la vida. Muestra pasion. El fondamiento de muestros ser. El estudio es, segun muestros savyos, la razon por la kuala mos kriyo el ke su nombre non se enmeta. Muestra enaltesia i inmomparable amor de saver podia kontrabalar vuestra egzaderada amor de poder i fuersa. Mozotros podiamos aprovechar se de proteksiyon ofresida de vuestras armadas royales ma, ken se aprovechava en verdad seriash vozotros profitando del adelamiento intelektual de muestra komunidad i de trokiya de sensia. Vos digo : podiamos ayudar unos a otros.  Komo ke mozotros agora somos rekordados de muestra virguensoza impotensia - ansi tambien vuestra nasiyon sufrira rekondando se para siempre del dekvilibrium ke lo oy mestistesh en movimiento. En los siglos ke vienen vuestros ijos pagaran pizgado por vuestro yero de oy. En ser ke la poder de arma es la koza ke la admiresh serash en verdad la nasiyon de konkvistadores kon pasiyon por oro i bienes solo, biviendo kon i muriendo de espada, goverando segun derecho animal. I non solo esto – sino serash la nasiyon da analfabetas. Vuestras institusiyones de estudio por amor de su temor de las kontaminasiyones heretikas de ideas ajenas, ideas de otros puevlos kulturas non seran mas respektadas. Kon pasar del tiempo una vez grande nombre de la Espanya, ignorante, Espanya, la nasiyon ke prometia tanto i kumpliyo tan poko.

I ayi un diva demandara la Espanya a si mizma : ke se izo de mozotros ? Porke mos izimos burla a las nasiones ? I esta Espanya mirata en su istoria i se demadara: porke paso esto? I los onestos entre eyos intonsens apuntaran en el diya el este i en el tiempo el este komo al empesijo de su kayida nasyonal. I apuantaran a sus Suverenes Katolikos Fernando i Isabela, konkvistadores de los morikos, expeladores de los Djidios, fondadores de la Inkvizision, i destruktores de la intelijensia espanyola diziendo : estos mos izieron kaer.

 

El edikto el este la prova de la floshidad kristiana. El amostra ke mozotros, Djidios, somos kapables de gana por siglos vieja disputasiyon entre dos relijiones muestras. El explika porke egzisten kristianos falsos, kristanos kon dudas sovre verdad de su relijion. Kon dudas kavzadas por mano del Dijio ke siempre lo save mejor. El explika porke la nasion kristiana se sienta tan endanyada komo kelo proklama. Kijyendo asilensiar la opozision djudia la medjoridad kristiana desideyo de non entrar mas en por eya tan peligroza diskusion, sino preferamente eliminar al raiz del kontraargumento danyozo. La oportunidad de explikar muestro punto de vista non mos se dara ni manyana ni nunka mas. Esto es la ultima oportunidad por la Espanya de definir muestra koza. En estos kvantos ultimos momentos de la libertad lisensiados a mi por « la mersed » del rey i reina, yo el ultimo reprezentante de la Djuderya espanyola, avlare solo de un punto de disputasiyon teolojika. Vos deshare kon tema de pensar, aunke vos no la keresh. La mesaje esta simple. El istoriko puevlo de Yisrael kon su tradisiyon es el ultimo djusiyo de la verdad del kristianizmo. El Mashiash esta destinado de salvar a Yisrael. Por estos mozotros, Yisrael, tenemos de desidir si somos o non salvados. Ma, mantando mos, kemando mos, solamente mos, amostrash ke la salvasiyon ke la esparamos daiynda non vino. Expolsando mos vozotros mizmos estash destruiendo kon vuestras manos proprias a mizmos argumentos vuestros. Azesh mos sufrir para ke etendamos ke el ke vinira por salvar mos de sufrir ya vino. Ma todo tiempo ke su prorio puevlo kontinua de redjektar lo vuestra relijion non tiene ninguna prova de su verdad. Podesh konvertir a todos los paganos del mundo – ma, asta ke el Djidio dayinda non konvertio non provastesh nada otro salvo ke puedesh enganyar al non informado. Mozotros partiemos kon esta sensia konsolante ke aunke tenesh la poder mozotros tenemos la verdad mas alta. Aunke tenesh en la mano la poder de azer loke keresh kon muestra personas, a las santas almas muestras i a la verdad istorika de kvala testigos somos non puedesh i ninka podrash azer algo.

 

Eskuchad me rey i reina de Espanya porke en el dia el este vos estas adjunatando a grande i larga lista de enemigos de lo kedado de kaza de Yisrael. Si bushkash muestra destruksion ke sepash ke el dezeyo vuestro non s’akumplira porke mas grandes i mas poderozos governadores mos kerian enbaldar i todo ke tuparon era su proprio perdimiento i kayida. En verdad mozotros seremos bendichos i prosperaremos en otras tieras leshos de aki. Porke en todo luger onde iremos el Dio de Yisrael es i estara kon mozotros.

 

I a vos Don Fernado i Dona Isabela la mano del Dio vos topara por kastigar ai mai de vuestro korason. Triste de vosotros autores de inikidad. Por djenerasiones ke vienen van a kontar i rekontar kvando kruela i diabolika fue vuestra fe, i kvanto siega i kurta vuestra viziyon. Ma, mas de vuestros aktos de odiyo i fanatizmo se rekordara, alavara i admirara la kuraje grande i inkomparable d’epuevlo de Yisrael ke non kayeron enfrente de poderoza Espanya imperiyal, sino preferiendo la verdad resivida de sus padres a la seguridad ke les dava la mintira rezistaron todas vuestras akusasiones i ofrendas.

 

Expulsad mos, echad mos por afuera de esta tiera ke no la amimos nada menos ke vozotros – ma, mozotros para siempre moz rekordaremos de vos dos rey i reina de la Espanya, komo ke las Santas Skrituras muestras se rekordan de todos ke muestro mal i muestra destruksiyon bushkaron. I seremos testigos en ojos de istoria de vuestra krueldad, i los rekordes de muestros sufrimientos vos agan el danyo mas grande de todo loke esta en vuestra mano de azer a mozotros. I vos prometo ke para siempre mos rekordaremos de vos i de vuestro edikto maldicho.

 

Kon esto Don Yishak Abravanel s’abolto saliendo de la kamareta koronal. Komo la reflekso a su salida dramatika la muchidumbre le izo lugar. Leshos en la salida le esperava su mujer, Ester. Kon lagrimas en sus ojos, lagrimas de orguyozidad por su marido. Kon kara de kontentez i achetamiento le se adirisho presto tomando lo por la mano.

El Djidio i la Djudia salieron amostrando ke su seguridad en verdad de misiyon de su puevlo non sufriyo de la poder kristiana. Despues de su salir los gritos empesaron de muevo, ma, el Golyat espanyol, sino por mas de momento, kayo.

 

 

Aki en Yerushalaim, Sivdad Santa, en el mez de Tishri anyo 5754, de Kreasiyon.

 

  Eliezer Papo

 

Retour au sommaire


- Copyright © 2007: Moïse Rahmani -