Isaac Levy

    Por muntchos Sefardim, la fiura di Isaac Kevy, Z.L., mos es deskonocida. Portante, el mos descho une meraz muy grande i di una valor ke non ay presio.

Nassido en Turkia nel 1919, imigro ala edad de 3 anios con sus parientes a Yerushalayim. Eredito di su madre la pasion de los cantes i romansas en ladino, i del padre ki lo cultivo en el amor delos cantes i melodias religiosas. El izo sus estudios en los conservatorios de Yerushalayim i de Tel Aviv i toda su vida fuè su pasion por la musica. Musicologo di grande talento, Isaac Levy mos descho dos erensias di grande valor. El aricojo todo modo di romansas cantadas en diversas okasiones por muestras madres i avuelas i las publiko in 4 livros ke contienen cada uno quaje 100 romansas differentes en cada uno con sus notas musikales i sus traducsiones en lingua franzasa. Oy, estas romansas las sentimos en cassettas o en CD, de toda parte del mundo, de Spania, de Israel, di las dos Amerikas i demuntchas partes de la Evropa. Diez livros de liturgia judeo-espaniola forman la antologia kel el musiko Isaac Levy mos descho con sus notas musikales de los diversos cantes religiozos i piyutim kantados con tanta kavanà por nuestros Rabinos, Hahamim i Hazanis.

De todas las partes del mundo i de autoritades competentes del mundo musikal, el rissivio omajes i rengrasiamientos por aver etcho estas ovras grandiozas, i aver ansi perpetuado estos cantes i melodias ki con eyos muestras madres i avuelas mos ingradisieron.

Issac Levy, el puevlo Sefaradi nunca ti va olvidar por tus briyantes ovras ke permeten i van apermeter con fuersa del Hachem, a mantener el Judeo-Espaniol coo ermoza lingua di muestros antenados.

 

Albert Mergian
 
Retour au sommaire



- Copyright © 1997 Moïse Rahmani <mrahmani.ise@skynet.be> -