BLOG - sefarad.org

Parachat Ekev, chabbat 20 Av 5774, 16/8/2014

MENU

SEFARAD.org
LOS MUESTROS

Annonces
Nos Peines
Nos Joies

 
 
                                                                       
La perasha de Ekev, empesa kon las palavras:
"I sera, ke si oyeresh a estos djuisios, i guardaresh, Adonay, tu Dio guadrara kontigo el firmamiento i la mersed ke djuro a tus padres".
Esta es prometa Divina a kondision, i RASHI mos viene kon su perush (komentario), diziendo ke se trata aki de las mitsvot insinyifikantes, los mandamyentos "menores".
Segun Rashi ay una valor espesial en mitsvot "chikas", porke la persona ke las kumple, demostra ke es devuado a los mandamientos de la Ley.

Por egzempio; es muy natural ke todos mozotros mos inchimos de entuziazmo en kantando el "El Nora Alila" en dia de Kippur. Este es un momento dramatiko, yeno de emosiones. Ma, es mucho mas difisil de alevantar a la maniana del otro dia, i saver kombinar "la Alaha kon la Melaha", i kumplir los mandamientos de la Ley en la vida de kada dia (i dia por dia).

Esto ambezamos tambien del akontesimiento ke paso en el dezierto kon el pekado del "bezerro de oro".  Moshe desendio del Monte de Sinay i las dos tavlas de la Ley en su mano.    Ke drama !  ke ruido i bozes altas: "Uvo truenos i relampagos, i nuve                ispesa sovre el monte, i un sonido de Shofar muy fuerte; i se estremesio el puevlo..."

Las segundas tavlas de la Ley (por las kualas meldamos en la perasha de la semana) se dieron a Moshe por mano del Dio en una manera muy modesta,          kaje a eskondidas.

Ansi mos konta Moshe:
"i desendi del monte, i meti las tavlas en la arka ke aviya echo, para ke estuvieran ayi, komo Adonay me enkomendo".

Una vez mas traygo a Rashi para darmos su opinion.
Rashi mos eksplika la diferensia:
"Las primeras tavlas ke se dieron kon ruido grande, les apozo "Ainara".                   No ay mijor ke la modestiya (umildad)."

Las segundas tavlas de la Ley, ke se dieron kon umildad, reflektan la importansa de las mitsvot "menores".

La perasha mos dize mas :
"Porke Adonay vuestro Dio.....Dio grande i poderozo, no toma koecho (shohad, dadiva para atorser el djuisyo), aze djuyisyo al guerfano, i a la bivda, i  ama al pelegrino".
El dotrino es, ke el Dio, Senior de los Seniores, mete tino tambien a los "detalyos" chikos.

Inshalla sepamos azer bien los mandamientos chikos,                           
i  el Dio kon su grasia kumpla muestras demandas chikas.

 
La Haftara es Ishaya 49, 14:50

- Copyright © sefarad.org - 1997 - 2019

Retour au Site sefarad.org