BLOG - sefarad.org

Parachat Ree. Chabbat 27 av 5774, 23 agosto 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de Re'e
 
En muestra perasha kontinua Moshe Rabenu su diskorso al puevlo de Yisrael en estando preparado a entrar en la tierra prometida:
"...Vozotros pasash el Yarden para ir a eredar la tierra ke vos da Adonay vuestro Dio; i la tomaresh i abitaresh en eya. Kuidaresh, pues, de kumplir todas la leyes i los djuisios ke yo pongo delantre de vozotros oy". Uno de los mandamientos al puevlo fue de tener en Erets-Yisrael un solo i uniko sakro lugar en el kual se yevaran todos los sakrifisios, ofrendas voluntarias, i las premisias de vakas i de ovejas. Bien entendido, ke oy en dia, i durante muchos siglos, tornamos en muestras orasiones al konfin de Yerushalayim, la sivdad santa de Yisrael. Ma la Tora, por mano de Moshe Rabenu, no avia mensionado ningun nombre espesifiko de un lugar o sivdad. Ansi dize el pasuk (12, 4): "Al lugar ke Adonay vuestro Dio eskojiere de todos vuestros trivos, para poner ayi su nombre para su morada - aya iresh". Segun el livro de Shemuel II (24,18), fue Gad el profeta el ke ordeno al rey David de levantar una ara en Yerushalayim, i ayi se fraguo despues el Bet-aMikdash, en los dias del rey Shelomo.
 
Al pareser ke esta fue la intension de la Tora: El Bet-aMikdash se fraguara kuando todos los trivos del puevlo Yisrael seran aunados, i abitaran todos sovre la tierra, seguros i en paz.
 
La Haftara es Ishaya 54, 11 i 18 (1-5)

- Copyright © sefarad.org - 1997 - 2019

Retour au Site sefarad.org