BLOG - sefarad.org

Parachat Shoftim, Shabbat 4 Ellul 5754, 30 agosto 2014

MENU

SEFARAD.org
LOS MUESTROS

Annonces
Nos Peines
Nos Joies

 
La perasha de SHOFTIM
 
El primer pasuk de la perasha empesa kon un orden muy seko i ofisyal:
"Djuezes i polises pondras en todas tus sivdades".
El segundo pasuk, eskrito komo en un estilo de proverbos, mos eksplika la sinyifikasion del orden:
"No atuertes djuisio, no agas distinksion de personas en el djuisio, no tomes dadiva por atorser. La djustisia, la djustisia seguiras".

Una de las profesias de Yeshayau (11, 9) mos dize ke en el futuro, la umanidad
"no aran mal, ni daniaran....porke la tierra sera yena del konosimiento de Adonay".

Empero, en mientres, no es posivle de konfiar al entendimiento i al konosimiento de kada individuo en la komunidad. Entonses, la Tora mos ordena de impozar leyes ke ovligen a las personas de azer lo bueno i lo djusto, i de evitar las malisias.
La esperansa es, ke el benadam, aunke aze djustisia a kavza de temor de la ley, azera, finalmente, todo lo derecho kon su propia veluntad, de alma i de korason.

"El djuisio es del Dio", mos dize la Tora (en Devarim 1, 17);  ma, esto no se disho por alivianar el pezgo de la responsibilidad de muestros ombros Todo al kontrario. Es por enseniarmos de ir en el kamino derecho del Dio,
el djuzgador verdadero i superior.

En Divre-aYamim/Kronikas II (kapitolo 19) meldamos por Yehoshafat, rey de Yehuda, ke nomino djuezes en todas sivdades fortifikadas del pais, i disho a los djuezes:
"Mirad lo ke azesh; porke no djuzgash por el ombre sino por Adonay;  
i EL esta kon vozotros kuando djuzgash".

La aftara de la semana (Yeshayau 51), es una de las siete aftarot de konorto.
Esta profesia mos publika paz i alegria "porke ojo a ojo veran, ke Adonay torna a Sion... porke Adonay konorto a su puevlo.deskuvrio Adonay el braso de su santedad a ojos de todas las nasiones, i todos los konfines (kavos) de la tierra veran la salvasion de muestro Dio".
 
                                               
La Haftara es Ishaya 51, 12 i 53 1-12

- Copyright © sefarad.org - 1997 - 2019

Retour au Site sefarad.org