BLOG - sefarad.org

Parachat Ki Tetse, Chabbat 11 Elul 5754, chabbat 6 Setiembre 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de KI TETSE

 

 

 

Le perasha de Ki Tetse es yena i rika en mitsvot.  En esta perasha topamos 74 mandamientos (del total de 613 ke mos manda la Ley). Unas de las mitsvot, ke avlan por reglas de gerra, paresen perteneser mijor a la perasha pasada de Shoftim.

 

 

Ma, en realidad, es muy defisil de topar relasion entre los mandamientos ke en la perasha, o algun orden o arreglo lojiko. Ay una variedad grande de mitsvot, en muchos i diferentes kampos de la vida. 

 

Talvez, lo ke podemos ambezar de este "desorden" es, ke en los ojos de la Tora

 

no ay partision entre mitsvot "livianas" o graves.

Por un solo enshemplo, tomaremos la mitsva ke muestros hahamim la yaman "shiluah aken" ("embiyo del nido").                    

 

Ansi eskrive en la perasha: "Kuando se topara delantre de ti en el kamino algun nido de ave an kualker arvol.......kon poyos.......i la madre echada (asentada) sovre los poyos.......no tomaras la madre kon los ijos. Desharas ir a la madre, i tomaras los poyos para ti. Para ke te vaya bien i prolonges (alarges) tus dias".

 

 

 

Una rekompensa semejante meldamos en los diez mandamientos 

 

(Shemot 20 i Devarim 5):
"Onra a tu padre i a tu madre komo te enkomendo Adonay tu Dio,

 

para ke se alargen (sean prolongados) tus dias,

 

i para ke te vaya bien sovre la tierra ke Adonay tu Dio te da".

En el Talmud (Nida 31) eskrive ke "tres sosios son en la kreasion del benadam:

el padre, la madre i el Santo-Bendicho-El". Entonses, al menos segun este aforismo, es klaro i evidente ke la persona tiene de onrar a su padre i a su madre. 

Ma, komo viene ser de resivir el mismo "premio", la misma paga, por akea mitsva de "embiyo del nido"?

Me parese ke en esto mos ensenia la Tora de no despresiar ningun mandamiento.

 

El konjunto de las mitsvot es ke mos gia al kamino de azer bondad en este mundo.

 

 

 

***


La aftara de la semana (en Yeshayau 54) es muy kurta, i es una de las siete profesias de konorto.
Meldamos aya las palavras del Dio a la nasion de Yisrael:                 

 

"Por un momento peknio te abandoni; empero te rekojere kon piadades grandes. Kon gran ira enkuvri mis fases de ti por un momento; ma kon mersed de siempre tendre piadad de ti".

 

 

 

La Haftara es Ishaya 54, 1-10

- Copyright © sefarad.org - 1997 - 2019

Retour au Site sefarad.org