BLOG - sefarad.org

Parahat Ki Tavo, Chabbat 18 Elul 5774, Chabbat 13 Setiembre 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de KI-TAVO
 

A lo tanto ke yegamos mas a la fin del livro de Devarim, mas pokas mitsvot topamos en kada perasha.

En la Tora entera ay 613 Mitsvot i komandamientos. En la perasha de la semana pasada aviyan (segun la lista del RAMBAM) 74 Mitsvot.
En muestra perasaha de Ki Tavo topamos en todo sesh Mitsvot, komo por egzempio el mandamiento de trayer bikurim (primisias de todos los frutos), al Bet aMikdash, ke de por si (ansina komo ansina), no es aktual en muestros dias kuando no tenemos templo en Yerushalayim.

Aun kon todo, mos keda el mandamieno ke dize ayi:
"I TE ALEGRARAS kon todo el bien ke Adonay te aya dado, a ti i  a tu kaza".
 
 
Si, klaramente ay aki orden divino de alegrarmos kon lo ke parvinimos a tener o obtener (sea poko o mucho).

Los komentadores de la Tora mos avizan ke todas las mitsvot ay de kumplir siempre kon alegria. Ke ansi mos dize el pasuk (Tehilim 100 ,2):
"Servid a Adonay kon alegria, venid delantre de EL kon kante".

Abravanel, Rambam, i otros savios mos rekomendan de meldar bien el pasuk (Devarim 28, 8-10):
"Enkomendara Adonay kontigo a la bendision.........kuando guadrares las enkomendansas del Dio, i ANDARAS EN SUS KAMINOS".

Por los kaminos del Dio, su virtud i kalidad, mos dan a entender ke las meldamos en Shemot (34, 6): "Adonay Dio, piadozo i mizerikordiozo,......grande de mersed      i  de verdad,......ke perdona delito i pekado......ets."

En muestra perasha (27, 9), despues de aver dado todas las mitsvot, avlo Moshe i los Koanim (saserdotes) a todo Yisrael, diziendo:
"Eskucha i oye, Yisrael !    oy, en este dia, te izites puevlo a Adonay tu Dio !"

Es solo despues ke un grupo de djente tiene sus leyes, moral i estoria, es ke merese yamarse PUEVLO.
Los desendientes de Yaakov-Yisrael, ke salieron de Ejipto, de la "kaza de siervos", resivieron la Ley delante del monte de Sinay, i pasaron muchas penas durante 40 anyos en el dezierto. Agora, OY, meresen ser puevlo.  El puevlo de Yisrael.

RASHI, apoza en las palavras "oy, en este dia" i  mos da su perush ke akseptemos las mitsvot kada dia de muevo. Ke sean kada dia komo muevas, komo las estrenimos oy mizmo.


Si me permetesh, un perush chiko mio a las palavras "Oy, en este dia, TE IZITES PUEVLO a Adonay":

Kada uno i uno de Yisrael, chiko o grande, todos semos igual en formando djuntos   al puevlo de Adonay.
Puede estar en la Kehila el gran rabino kon otros ocho savios i profesores, ma no empesan la tefila si no se adjunta el diezen djidio, ke a vezes es un ninio de 13-14 anyos, o algun otro djidio simple i ordinario.

 
 
La Haftara es Ishaya 60, 1-22
 
 

- Copyright © sefarad.org - 1997 - 2019

Retour au Site sefarad.org