BLOG - sefarad.org

La Perasha de Nitsavim-Veyeleh, Chabbat 25 Elul 5774, Chabbat 20 Setiembre 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de NITSAVIM-VEYELEH

 
 
Este Shabat komensamos una seria de kuatro perashot, todas muy kurtas, i ke son los ultimos kapitolos de la Tora.

En siertos anyos (komo oganyo, 5774, tambien) se meldan djuntas las dos perashot:
Nitsavim i  Va'yeleh, ke en realidad fueran eskritas i relatadas al puevlo en los ultimos dias de Moshe Rabenu, i dunke, una nuve de tristeza flota entre las linias. Tambien no podemos ignorar la frustrasion personal de Moshe, en saviendo ke no avia reushido por entero a plantar en los korasones de los ijos de Yisrael la absoluta fe en el Dio.

Ansi disho Moshe al puevlo en los ultimos pesukim de Va'yeleh:
"Porke yo konosko tu rebelion, i tu dura servez; ek, ke aun biviendo yo kon vozotros oy, sosh rebeldes a Adonay. ?Kuanto mas despues de mi muerte?"

Ma, el esensial, i lo mas importante, ke meldamos este Shabat,
es ke el Dio konfirma una vez mas al puevlo de Yisrael komo Su puevlo, segun ya mos avia dicho, i komo lo djuro a muestros padres Avraham, Yitzhak i Yaakov.

El pakto entre el Dio i el puevlo de Yisrael es para siempre i siempre, komo ansi mos dize el pasuk:
"I no solamente kon vozotros ago Yo este pakto i este djuramiento, sino kon los ke estan aki prezentes oy kon nozotros.........i kon los ke no estan aki oy kon nozotros".

Aparte de darmos la libre eleksion de azer lo bueno en ojos de Adonay, me parese sentir aki, - en las siguientes palavras- el amor del Dio por kada uno i uno del puevlo de Yisrael:

"Porke esta enkomendansa ke Yo te ordeno oy, no es demaziada difisil para ti, ni esta leshos. No esta en el sielo, para ke digas: "Kien suvira por nozotros a los sielos i la traera, i nos ara oirla para ke la kumplamos?"....... ..Ni esta del otro lado de la mar ......Porke muy serka de ti esta la palavra, en tu boka i en tu korason, para ke la kumplas".


La Haftara es Ishaya ; 61, 10-63

- Copyright © sefarad.org - 1997 - 2019

Retour au Site sefarad.org