BLOG - sefarad.org

La perasha de AAZINU, Shabbat Chouva, Shabbat 3 Tichri 5775, shabbat 27 Setiembre 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de AAZINU

 

 

En el sentro de la perasha de Aazinu meldamos una poezia sublime.  Eya mos konta por el pasado de muestro puevlo, por danios i por males; i despues por un futuro de konsuelo i de esperansa buena.

Esta poezia kontiene todos los evenimientos de muestra nasion desde la salidura de Ayifto asta el fin de los dias.

Los komentadores de la Tora mos notan ke todas las penas i  sufriensas ke pasimos, ekspulsiones i matansas, estan ya eskritas en la poezia de Aazinu.

Rabenu Moshe ben Nahman (RAMBAN) dize ke es un testimonio divino ke mos da una prometa de regmision kumplida en el futuro.  Segun el, afilu si fuera esta poezia una karta de algun astrologo, i ke todo por todo asta oy se realizo, podiamos kreer en eya. Kon mayor razon, tenemos de kreer  i  de esperar kon todo korason a las palavras del Dio Santo, por mano de Moshe su profeta fiel, pastor de Yisrael.

Kuando la perasha de Aazinu se enkontra en el Shabat ke entre
Rosh-aShana i Dia de Kipur, se melda la aftara en Oshea 14.
El primer pasuk de la aftara empesa kon las palavras ebreas
"Shuva Yisrael" (tornate ! O, Yisrael ! a Adonay tu Dio").
De aki konosemos a este Shabat komo "Shabat Shuva".

El profeta Oshea implora al puevlo, i a kada uno i uno del puevlo, de tornar a Adonay i andar segun la Ley: "Porke los kaminos de Adonay son derechos i los djustos andaran en eyos".


Los Judios de Yemen, i otros tambien, meldan la aftara en Yoel (kapitolo 2, 16-27).
El profeta Yoel yama al puevlo: "Tanyed shofar en Sion, proklamad ayuno, apregonad asamblea !".
La profesia de Yoel dize ke el Dio se apiadara de su puevlo, i no mos dara mas por repudio entre las nasiones".

Kuando alkansa el tiempo de la perasha de Aazinu en la semana entre Kipur i Sukot, se melda la aftara en Shemuel II, kapitolo 20.
El pararelismo entre la perasha i la aftara es antes de todo por la forma poetika de las dos. Ma, el kontenido es muy diferente. En Aazinu topamos reproshes, mientras ke en esta aftara meldamos poezia del rey David, rengrasiando al Dio por su mersed.

La igualdad entre la dos poezias es en siendo las dos, poezias de viktoria:  El triunfo del Dio sovre los enemigos de Yisrael (en "Aazinu), i el triunfo de David frente sus adversarios; por bien entendido, ke kon el ayudo del Dio.
"El Dio,.eskudo es a todos los ke se abrigan en el".

Es interesante de notar ke los Ashkenazim uzan a meldar la poezia de David otra una vez entre el anyo: en el Shabat de Beshalah, komo aftara a la "Poezia de la Mar".

Indemas, esta misma poezia del rey David la topamos una vez mas (kon siertas pokas variasiones) en Tehilim kapitolo 18.

La Haftara es Osee XIV

- Copyright © sefarad.org - 1997 - 2019

Retour au Site sefarad.org