BLOG - sefarad.org

Parachat Berechit, Shabbat 24 Tichri 5775, Shabbat 18 Octobre 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de BERESHIT
                                                                                                  
Besimana Tava – en buen siman empesamos a meldar la Tora de muevo, semana por semana, en dias de Shabat.
 
La primera perasha, "Bereshit", empesa kon el pasuk ke kaje todo el mundo lo konose: "En el prinsipio, kreo el Dio los sielos i la tierra". En seguida kontunea la Tora a kontarmos el "proseso" de la kreasion, en un orden ke afilu los investigadores i ombres de la sensia naturala lo topan lojiko. Ma, esto no mos enteresa tanto. La Tora no viene a ambezarmos geolojia ni astronomia.
 
Toda la deskripsion de los sesh dias de la kreasion es para aksentuar la konsepsion, adoptada por mozotros Judios, de UN Dio, kreador de todo el universo. Kon razon eskrivio el RAMBAM en su livro More Nevuhim ke "sin tala konsepsion primaria, muestra realidad spiritual seria enteramente otra, i no para bueno".
En el sejen dia de la kreasion, meldamos: "I kreo el Dio al ombre en su imajen, a imajen del Dio lo kreo; varon i embra los kreo; i los bendisho el Dio".
En la persona se ekspresa esta "imajen" en su dominasion sovre la natura.
Este perush de Rabi Seadia Gaon esta bazado a lo ke eskrive en un pasuk anterior (Bereshit 1. 26): "Entonses disho el Dio: "Agamos ombre….i podesten sovre el peshe de la mar, i sovre las aves de los sielos, i sovre las bestias, en toda la tierra".
Rabi Yaakov Huli en el livro Meam Loez se demanda:
 
Porke, entonses, fue el ombre kreado en el sejen dia, kuando en el mismo dia fueron kreados tambien "todos animales de la tierra". Porke no fueron los animales kreados en dia de djueves djuntos kon las aves i los peshkados?"
 
El perush de Rabi Huli es, ke el ombre fue kreado en el mizmo dia ke los animales fueron kreados, para ke aprenda el ombre ser umilde i non arrogante. El solo avantaje ke tyene la persona sovre las bestias i los animales es el dono divino de "libre eleksion", saver apartar entre bueno i malo, por elijir su kamino en la vida.
 
 
                                                           
 
La Haftara es Ishaya 42 (5-20)                                           
                    

- Copyright © sefarad.org - 1997 - 2019

Retour au Site sefarad.org