BLOG - sefarad.org

La perasha de NOAH, Rosh Hodesh, Shabbat 1er Hechvan 5776 samedi 25 octobre 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de NOAH

 

La perasha de Noah esta, en realidad, despartida en dos partes:
Lo ke akontesio antes del Mabul (deluvio), i lo ke paso despues de este evenimiento terrivle.
Es kuriozo, ke kada parte tyene kaji el mismo numero de pesukim: (77 i 76).

Solo diez jenerasiones pasaron desde la kreasion de Adam asta Noah, empero una diferensia enrome kayo en el karakter del mundo. En la epoka de la kreasion topamos un ambiente de armonia total:

"I vido el Dio todo lo ke avia echo, i ek, era muy BUENO"
(Bereshit 1,31).

Poko tiempo despues, meldamos: "I vido Adonay ke la malisia del ombre era mucha en la tierra, i ke todo instinkto de los pensamientos de su korason era de kontinuo solamente MALO". (Bereshit 6, 5).

Por esto disho el Dio: "La fin de toda karne vino delante de mi porke la tierra esta yena de violensia".
Ayi es ke lo avizo el Dio a Noah:
"Entra tu i toda tu kaza en la arka, porke a ti vide djusto
delante de mi en esta jenerasion".

Noah kumplio este mandamiento del Dio "a la punta de la letra"; ma, segun notamos, no se esforso de nada para rogar i de mandar a Dio ke mire a sus kriansas kon ojos ojos de mersed, talvez se apiadara el Kriador..
 


                                            ***
Despues del Mabul se fragua un mundo enteramente diferente del anterior.

El filozofo Judio Emmanuel Levinas avia dicho ke "la koegzistensia entre dos personas puede ser bazada solamente sovre sentimientos de amor. Ma entre tres personas (o mas) ya se nesesita ley i reglas".

La armonia total i el ambiente romantiko ke avia en el paradizo -
ya pasaron del mundo.
Entonses, en este muevo mundo metio el Dio las reglas de la natura:

"Mientras todos los dias de la tierra, no sesaran la sementera
i la segada, el frio i la kalor, el enverano i el invierno, el dia i la noche".

Indemas, segun el muevo pakto del Dio kon Noah i sus desendientes (toda la umanidad asta oy en dia), no tornara mas el Dio a maldizir la tierra por kavza del ombre, aunke "el instinkto del ombre es malo desde su djoventud".

Mos guadraremos, i el Dio mos guadrara de todo mal.
 
 
La Haftara es Ishaya 66
 

- Copyright © sefarad.org - 1997 - 2019

Retour au Site sefarad.org