BLOG - sefarad.org

Parashat Shelah Leha, shabbat 16 Sivan 5774, shabbat 14 junio 2014

MENU

SEFARAD.org
LOS MUESTROS

Annonces
Nos Peines
Nos Joies

שלח לך
 
SHELAH LEHA                                            
 
 
En la perasha de esta semana avlo el Dio a Moshe diziendo: "Enbiya tu varones ke espiyen la tierra de Kenaan, ke Yo do a los ijos de Yisrael".
 
Las palavras SHLAH LEHA en ebreo sinyifikan komo "embiya tu (por ti)". Rashi mos eksplika, ke el Dio no ordeno aki a Moshe ke mande personas para ver  i espionar la tierra de Kennan, ma le disho komo "si kieres embiyar, azelo".
 
SHaDaL (Shmuel David Luzzatto) dize por el mezmo pasuk:"Enbiya tu, por tu bien, para ke sepa el puevlo del empesijo kuala es la tierra de Kennan, i ke no se keshen despues".
 
Kien fueron los ombres ke embiyo Moshe?
- "Por kada trivo........embiares un varon,  kada uno mayoral entre eyos"
 
El orden de Moshe a los espiones fue muy klaro:"Suvid por aki, por el sud, i suvid al monte; i ved la tierra, ke tal es; i el puevlo ke mora en eya,si es fuerte o flosho...i  ketal es la tierra, es buena o mala.. i las sivdades...si en tiendas o en kastiyos".
 
Despues de 40 dias tornan los espiones kon las repuestas a las demandas de Moshe: "La tierra...mana (fluye) leche i miel... ..MA, el puevlo ke mora en la tierra es fuerte, i las sivdades enkastiyadas, ets.
 
Esta palavra chika, "MA", ke disheron los espiones pezga mucho,   i aze toda la diferensia.
Ribi Yitzhak Arama en su livro "Akedat Yitzhak", dize: Los enbiados pekaron mucho visto ke desharon el posto de espiones i se tomarom el posto de konsejeros.
 
Segun todos los komentadores, los espiones pekaron aki kuando no prezentaron una informasion objetiva.
 Eyos adjuntaron i dieron sus ideas i sus impresion personal, ma ke no fue sus rolo de azerlo.
 
La enfluensa de las palavras de los espiones, sovre el puevlo, fue muy muy grande i grave: "I toda la kompaniya alsaron grito...i el puevlo yoraron akea noche......i murmurearon kontra Moshe......i disheron:agamos un kapitan i tornemos a ayifto".
 
Todos los nisim i las maravias del Dio en el kamino asta agora se ulvidaron en una, se desparesieron komo si no uviera nada apenas de oyir la informasion ke dieron los diez espiones.
 
Solo dos espiones de los dodje (Kalev ben-Yefune i Yeoshua Bin-Nun) mostraron fe en el Dio , i disheron al puevlo:
"No temash al puevlo de la tierra......Adonay esta kon nozotros".
 
Ma, el puevlo no kijeron sintirlos de nada, i avlaron de apedrearlos kon piedras.
 
{   Personalmente no esto tanto en la mizma idea de los komentadores.
Me parese djusto ke SI; siertamente, el dover del espion es de dar el total de la informasion, djuntos tambien kon su opinion i su evaluasion.
A la fin fin, los espiones de Moshe no eran solamente mosos enbiyados. No mos olvidemos ke eran "mayorales, kaveseras de los ijos de Yisrael".
 
El uniko yerro, me parese, es ke dieron sus reporto enfrente "toda la kompaniya de los ijos de Yisrael" al lugar de konsultar a solas kon Moshe i Aaron, los lideres del puevlo.
Muchas vezes, asta oy, kontunean muestros mayorales azer mezmo yerro, avlando kon jurnalistas, dando opiniones, planos       i taktikas..... }
 
Rabi Yohanan (en el Talmud, masehet Taanit 30,2), mos dize ke akea noche en el dezierto, fue la noche del 9 del mez de Av;            i disho el Dio: "Vozotros yoratesh por nada, i sin razon. Yo la azere esta noche por vos nochada de yoro i yanto por jenerasiones."
 
{Aki yegamos a una kestion muy fonda por la kual enguaya Yermiyau el profeta (31, 29): "Los padres komieron (uvas) agras,     i los dientes de los ijos sufren ??!"}
 
**
En los ultimos pesukim de la perasha, meldamos unas enkomendansas a los ijos de Yisrael "ke se agan tsitsit sovre las aldas de sus vestidos, por sus jerenansyos, i metan sovre el tsitsit......un kordon de kolor cheleste (siel).....para ke kuando lo veresh vos akodresh de todas las enkomendansas de Adonay".

Una enkomendansa tan klara i muy simple, ma ke 99.9% de los ijos de Yisrael no la umplen.   Estranio, no?
 
Por seguro, todos konosesh el talet (talit); ma ande esta el kordon "siel" enkomendado en la Tora?

Por varyas razones eskolastikas sovre el orijin korrekto de la kolor siel (cheleste), i komo ekstraerla, no todos kumplimos esta mitsva tan prinsipal...




La Haftara es Josue 2

- Copyright © sefarad.org - 1997 - 2019

Retour au Site sefarad.org