BLOG - sefarad.org

Perasha Toldot, Shabbat 28 Hechvan 5775, 22 noviembre 2014

MENU

SEFARAD.org
LOS MUESTROS

Annonces
Nos Peines
Nos Joies

 
La perasha de TOLDOT
 

La perasha de Toldot es la unika en el Humash dedikada a Yitzhak Avinu, en frente de tres perashot sovre Avraham  i algunas diez sovre Yaakov Avinu.

La perasha mos entra a ver la vida en la kaza de Yitzhak,
en la kual no reinava la armonia:
Los melisios/medios/buchukes Esav i Yaakov, tan diferentes en sus karakter, teniyan una sierta rivalidad entre eyos.
"Esav fue varon kapache en la kasa, varon de kampo; i Yaakov era varon kieto, moran en tiendas".
Yitzhak -el padre- amo a Esav porke komiya de su kasa, ma  Rivka -la madre- amava a Yaakov.

Imitando, al pareser, a su padre, se kazo Esav i el tambien a la edad de kuarenta anyos. Las dos mujeres de Esav, ijas del puevlo Heteo "fueron amargura de espirito para Yitzhak i para Rivka".                                                                                          Ma en ningun lugar en la Tora no topamos ke Yitzhak trato en kualker ora impedir a su ijo Esav de kazarse kon las ijas paganas.

Sera ke Yizhak, el agrikultor, el ke lavra su tierra, admirava a su ijo Esav, por ke era varon de kampo. Tambien, savemos lo ke eskrive en Mishle (10,12): "El amor kuvre todas las faltas".
Sera ke Yitzhak, el mismo, era de karakter un poko pasivo, i, dunke, se desidio deshar a sus ijos a elijir sus kaminos en la vida. Sera tambien ke Yitzhak ya saviya kon toda seguridad ke es Yaakov su ijo el ke va kontinuar la tradision de la famiya, i es su desendensia la ke va eredar la tierra prometida.

De todas maneras, fue Rivka la ke konvensio a su marido Yitzhak de mandar a Yaakov a tomar mujer de su pais natal.
"Entonses, Yitzhak yamo a Yaakov i lo bendisho i le enkomendo, diziendo:                                                              "No tomes mujer de las ijas de Kenaan !...... i el Dio Todopoderozo te bendiga.....
i te de la bendision de Avraham, a ti, i a tu desendensia,
para ke eredes la tierra ke el Dio dyo a Avraham".
 
La Haftare es Shmuel 1  20 (18-42)

                                                          

- Copyright © sefarad.org - 1997 - 2019

Retour au Site sefarad.org