BLOG - sefarad.org

Perasha Vayetse, Shabbat 7 Kislev 5775, 29 noviembre 2014

MENU

SEFARAD.org
LOS MUESTROS

Annonces
Nos Peines
Nos Joies

 
La perasha de VAYETSE                                                                 
 

En esta perasha akompanyamos a Yaakov muestro padre en su kamino de Beer Sheva para ir a Haran.
A la madrugada, despues de un deskanso en la sivdad de Bet-El, izo Yaakov una promesa, dizyendo:
"Si fuere el Dio konmigo, i me guadrara en este kamino en ke vo, i me diere pan para komer, i vestido para vestir, i si volvere en paz a kaza de mi padre, Adonay sera mi Dio.......i de todo lo ke me dieres, el diezmo apartare para TI".

Mos viene muy muy estranya esta promesa ke izo Yaakov Avinu, en kontradiksion de la kondukta de sus padres ke amavan al Dio i lo ovedesiyan totalmente sin kondision.

Muestros hahamim, klaramente, ya lo notaron; ma, syendo ke siempre ay de bushkar algun argumento djustikativo, eyos defenden a Yaakov dizyendo ke la rogativa de Yaakov no fue para lograr benefisios materiales sino por guadrarlo de pekados. Los pekados ke muestros hahamim kontan son: idolatria, derramamiento de sangre, difamasion i infamias seksualas.

La kronika de la vida de Yaakov mos da a saver, ke (afilu si en realidad estas fueron las rogativas de Yaakov), no se kumplio ni una de sus rogativas !

1. Rahel su mujer rovo i trusho en kaza los idolos de Lavan;
2. Sus ijos Shimon i Levi, en un akto de vendetta, mataron a los
    sivdadinos de Shehem;
3. Su ijo Yosef, traiya la mala fama de su ermanos;
4. Reuven, el ijo behor de Yaakov, tuvo relasiones seksuales kon Bilha, la mujer de su padre.   
Tambien, Yehuda, un otro ijo de Yaakov, tuvo relasiones kon su nuera Tamar.

Komentadores de la Tora dizen ke Yaakov fue kastigado ansi por su pekado en tomando kon enganio la bendision de su padre Yitzhak.

Ma malgrado todo esto, el Dio-Baruh-U repeta en muestra perasha su bendision a Yaakov:
"Todas las famiyas de la tierra seran benditas en ti i en tu desendensia".

Kien diese, i todas las famiyas de la tierra komprendaran la sinyifikasion de esta promesa Divina.
 
La Haftara es Osee 11-12

- Copyright © sefarad.org - 1997 - 2019

Retour au Site sefarad.org