BLOG - sefarad.org

Perasha Mikets, Shabbat 28 Kislev 5775, 20 diciembre 2014

MENU

SEFARAD.org
LOS MUESTROS

Annonces
Nos Peines
Nos Joies

 
La perasha de MIKETS
 
La perasha de la semana pasada termina kon el pasuk ke mos konta ke "el shef de las bevidas de Paro no se akordo de Yosef sino ke se olvido de el".
Dunke, Yosef kedo en la karsel por otros dos anyos mas.

Pero, mos demandamos, ke okuriya kon Yosef si era liberado
estonses por kavzo de la bondad de su amigo de la prizion?

-  Es posvle, ke a lo mijor, Yosef alkansava enkontrar kualkier empiego en Ejipto basho algun otro amo. Ama, no mas.

Agora, en muestra perasha, "Akontesio al kavo de dos anyos
tuvo Paro un suenyo" i despues, en la mizma noche, sonyava Paro otro un suenyo, raro i kuriozo komo el primero.  Estos dos suenyos kavzaron a Paro una grande ajitasion de espirito, i enbio i yamo a todos los magos de Ejipto por saver ke fue la sinyifikasion de akeos suenyos;                                                                                  ma no avia kien los soltara a Paro.

En esta situasion sin solusion fue ke lo yamaron a Yosef de la
karsel para entender i soltar los suenyos de Paro; i ansi mos dize el pasuk: "Entonses enbio Paro i yamo a yosef, i lo izyeron KORRER de la prizion".

(Dos anyos enteros pasaron avagariko, sin ningun evento importante. Ma, kuando viene la ora, si el Dio kiere, todo se aze imediatamente i kon adjele).

Antes de soltar los suenyos, le disho Yosef a Paro:
"No esta en mi;  El Dio responda paz a Paro".

Yosef no solo parvino dar el perush de los suenyos, ma tambien
supo dar a Paro un buen konsejo de ke manera dirijir la ekonomia del pais en el proksimo futuro.
En esto, Paro entendio muy bien, ke Yosef no fue un simple "intermediario" para solamente soltar suenyos.

Ansi le disho Paro a Yosef:
"Pues ke el Dio te izo saver todo esto, no ay entendido ni savio komo tu. Tu estaras sovre mi kaza, i por tu palavra se governara todo mi puevlo".

El destino del puevlo de Yisrael tambien fue determinado en akea ora istorika.


La Haftara es Zacaria 2
                       

- Copyright © sefarad.org - 1997 - 2019

Retour au Site sefarad.org