BLOG - sefarad.org

Perasha Vayigash, shabbat 5 Tevet 5775, shabbat 27 diciembre 2014

MENU

SEFARAD.org
LOS MUESTROS

Annonces
Nos Peines
Nos Joies

La perasha de VAYIGASH

 
En la perasha de Vayigash yega la drama de Yosef i sus ermanos a la mas alta tension.

Yosef, el governador de Ejipto, atormento a sus ermanos durante dos anyos enteros, i les kavzo muchas penas, al pareser komo un akto de vengansa: Vente i dos anyos antes, se akonsejaron los ermanos a matar a Yosef, i despues lo vendieron komo esklavo. No podemos djuzgar a Yosef por su maldad; el sentimiento de vengansa en konsekuensia de un kavzo semejante parese ser muy natural i djustifikado. Ma, muestros hahamim lo djustifikan a Yosef de otro punto de vista. Segun eyos, Yosef trato de traer a sus ermanos a ekspresar sus sentimientos de arrepentimiento; ke ansi sera sus pekado perdonado por los sielos tambien. I ansi fue, ke en una de las oras de estrecho, dezian los ermanos de Yosef el uno al otro:
"En verdad, semos kulpantes tokante a muestro ermano, en lo ke vimos la angustia de su alma, kuando mos rogava, i no lo eskuchimos; por tanto vino sovre mozotros esta angustia"

Esta konsepsion de muestros hahamim esta bazada sovre el pasuk en Mishle (28, 13): "El ke enkuvre sus pekados no prosperara; ma el ke los konfesa i se aparta, alkansara mizerkordia".

Aki, en muestra perasha, despues de la amenaza de Yosef de tomar a Benyamin, su chiko ermano, por esklavo, se ayego Yehuda a el, i en un diskorso emosionante, yeno de rogativas, parvino tokar al korason de Yosef, el kual -yorando a gritos-se dyo a konoser a sus ermanos.

mos akodraremos, ke antes de abashar a Ejipto djuntos todos los ermanos, inkluye Benyamin tambien, Yehuda prometio a Yaakov su padre: "Enbiya al djoven (Benyamin) konmigo...... yo lo afiansare, de mi mano lo bushkaras; si no te lo vuelvo a traer....... sere para ti el kulpable para siempre".

Esta garantia de Yehuda a su padre fue bazada solamente a una palavra de onor. Ansi ke este sentimiento de responsabilidad, i el kargo de la fiansa, paso a mozotros todos komo una erensia sakrada: "Todo Yisrael tenemos responsabilidad mutual el uno para el otro.
 
                                              
La Hafatara es Ezechiel 37  

- Copyright © sefarad.org - 1997 - 2019

Retour au Site sefarad.org