BLOG - sefarad.org

Perasha Vayehi, Shabbat 12 Tevet 5775, shabbat 3/01/2015

MENU

SEFARAD.org
LOS MUESTROS

Annonces
Nos Peines
Nos Joies

 
 

La perasha de VAYEHI

 


Kon la perasha de Vayehi, terminamos de meldar el livro de Bereshit, ke es el primer livro del Humash.   
(Humash = los sinko livros de la Tora).

El livro de Bereshit mos konta por las vidas de muestros padres antiguos; tambien mos ensenya kuala es la sinyifikasyon verdadera de la vida de la persona.

La valor de la vida no se kalkula en el numero de las respirasiones, ni en la kantidad de movimientos ke izo kualker persona durante su egzistensia sovre la tierra; ni a kuantos anyos le turo esta vida.

La kestion de la vida es su kalidad, i si es ke profitimos de la vida en manera djusta i verdadera.

Tambien ay de no olvidar el atadijo ke tenemos de guadrar siempre kon el mandero de la vida; ke ansi dize el pasuk:
"Ma vozotros, ke vos apegastesh a Adonay vuestro Dio, todos estash bivos oy" (Devarim 4,4).

Yaakov Avinu, ke bivio 147 anyos, le disho a Paro:
"POKOS i malos fueron los anyos de mi vida".
Parese sentir aki un tono de tristeza en yindo malgastada
su vida, mientras el (Yaakov), estuvo metido demaziado
en sus problemas material, i en su luto por kavzo de la
separasion de Yosef.

Agora, despues de pasar 17 anyos (buenos) en Ayifto, kon toda su famiya a su derredor, yamo Yaakov -en los ultimos dias de su vida- a Yosef i lo kondjuro:
"Te rogo ke no me enterres en Ayifto".

En mientres le konto Yaakov a Yosef por su madre (Rahel):
"......i yo, kuando viniya de Padan, Rahel me se murio en el kamino.......
i la enterri ayi, en el kamino de Efrat, ke es Bet-Lehem".

Ay en estas palavras komo regreto por no enterrar a su mujer amada a su lado en Mearat Mahpela. Tal vez ay aki tambien komo una ekskuza delantre de Yosef.

De la otra parte mos dize Rashi, ke el enterro de Rahel por el kamino, fue eskrito de los sielos:
Ansi, ke en saliendo muestro puevlo al Galut, en el tiempo de Nebukadnesar, pasaron los expulsados por la tomba de Rahel, madre de Yisrael.

Tenemos testimonio de Yermiyau el profeta (31,15): "Boz fue oyida, alguaya i yoro amargo, Rahel lamenta por sus ijos";         
i el Dio le responde (a Rahel): "Detiene tu boz de yoro, i tus ojos de lagrimas...porke salario/paga ay para tu ovra, i tornaran tus ijos de la tierra del enemigo".


La Haftara es Reyes I, 2, 1-12

- Copyright © sefarad.org - 1997 - 2019

Retour au Site sefarad.org