BLOG - sefarad.org

Perasha Shemot, Shabbat 19 Tevet 5775, Shabbat 10/1/2015

MENU

SEFARAD.org
LOS MUESTROS

Annonces
Nos Peines
Nos Joies

 

 

La perasha de SHEMOT

 

 

En las leyes de la Tora vemos a tanto fue importante el estado del Behor, tan alto i respektado. El fue el "senyor de los ermanos"; afilu en la erensia del padre resiviya el Behor la parte mas grande: "para darle dos tantos/doble de todo ke les revyene a kada uno de los ermanos" (Devarim 21,17).

De la otra parte, (muy muy diferente de lo ke deskrive arriva), topamos en los varyos akontesimyentos ke en la Tora una koza kurioza, por la kuala ay muchos egzempios:


1.  
Kayin (el primer Bohor del mundo), i su ermano Evel, trusheron prezentes a Adonay, i ek, "Miro el Dio (kon agrado)
a  Evel i a su ofrenda, i a Kayin i a su prezente no miro".

2.  Terah endjendro a Avram, Nahor i Aran.
Avram, i tambien Nahor, tomaron por mujeres a las ijas de Aran; ke de aki parese ke Aran fue el Behor.
I na, Aran muryo en vida de su padre en su pais natal, i el Dio yama a Avram de ir a la tierra de Kenaan.

3.  Sara, la mujer de Avram tadro de parir ijo a su marido; entonses su sierva, Agar, le paryo a Avram a Yishmael, el ijo Behor. Ma, el Dio disho a Avraam: "En Yitzhak te sera yamado semen".

4.  La lucha entre Yaakov i Esav, por kien sera el Behor,
empeso ya antes de su nasimiento; Despues, Esav menospresio la primodjenitura i se la vendio a Yaakov por un gizado de lentejas.
Yaakov resivyo la bendision de su padre (aun kon enganio),
i de toda manera, en salyendo Yaakov para ir al pais de Aram, lo bendisho Yitzhak personalmente:
"i te de (el Dio) la bendision de Avraam, a ti i a tu semen kontigo".


Una vez mas, el linaje pasa del behor al segundo ijo.

5.  Un kavzo semejante al parto de Yaakov i Esav akontese kon Peretz i Zerah, los bochukes (djemelos) ke pario Tamar a su suegro Yehuda (Bereshit 38, 27).
Peretz, ke no era el bohor, tuvo el zehut de ser en la kavesera
de la dinastia de David, rey de Yisrael (Rut 4, 18).

6.  Este fenomeno se repeta en la bendision de Yaakov a sus
ijos:  Reuven, ke era el behor, kedo "al kyenar" i resivyo reproshes de parte de su padre, mientras ke las bendisiones sovre Yehuda i Yosef demonstran kien fueron los preferidos.

7.  Lo mizmo akontese en la bendision ke regalo Yaakov a sus nietos: 
"I Yisrael/Yaakov ekstendio su mano derecha, i la pozo sovre la kavesa de Efrayim...
i su estyedra sovre la kavesa de Menashe; aunke Menashe era el primodjenito, el behor".

Todos estos fatos, i semejantes, en la Tora, mos trayen a
egzaminar ke sera la validez de akeya deklarasion divina:
"Beni Behori Yisrael" (Shemot 4, 23).

Bueno, no mos olvidemos ke en realidad, el puevlo de Yisrael
NO es el primer puevlo ke nasio en el mundo. Kuando desendyo la famiya de Yaakov Avinu a Ayifto no kontava mas de 70 almas, mientras ke en akel tiempo, i ayinda mucho antes, ya egzistiyan en el mundo puevlos numerozos, i reinados fuertes.
Entonses, el puevlo de Yisrael no es el Behor kronolojiko, si no ke es el ESKOJIDO por el Dio.  
Ansi se repeta en Yeshayau (45, 4): "Yo so Dio de Yisrael; por amor de mi siervo Yaakov i de Yisrael eskojido".

La estoria, tan difisil i yena de obstakolos, de muestro puevlo,
parese totalmente komo realizasion del pasuk en Mishle (3,12):
"Porke Adonay, al ke ama  -  kastiga; aun komo el padre al ijo, a kien kiere/envelunta".

Ser el behor del Dio no mos da ninguna preferensia material.
Tal vez al kontrario. Es una karga espiritual muy pezgada, porke tenemos de luchar perpetualmente, i a lo tanto posivle, de ser dinyos al titolo "el puevlo eskojido".




La Haftara es Irmiyahu 1-2

- Copyright © sefarad.org - 1997 - 2019

Retour au Site sefarad.org