BLOG - sefarad.org

Perasha Vaéra, Shabbat 26 Tevet 5775, shabbat 17 janvier 2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de VAERA

 

La perasha de Vaera mos konta ke Moshe i Aaron avlaron kon Paro, rey de Ejipto, para sakar de Ejipto a los ijos de Yisrael.
"Solta a mi puevlo!" le disheron en nombre del Dio.
Ma, Paro refuzo de kumplir esta demanda.

Entonses, en muestra perasha meldamos sovre las feridas ke trusho el Dio sovre los ejipsianos.

En la primera ferida dize el Dio a Moshe:
- "Di a Aaron: toma tu vara, i ekstende tu mano sovre las aguas de Ejipto, sovre sus rios, i sovre sus arroyos...i se aran sangre".

Muestros hahamim mos notan ke la ferida sovre las aguas fue echa mezo Aaron i no por mano de Moshe; dunke, parese ke tenemos de tomar lision de este kavzo: Siendo ke Moshe, en su ninyez, salvo su vida por medio de las aguas del rio, no seria etiko de parte de Moshe mismo a danyar las aguas de Ejipto.

Es kuriozo de notar tambien ke las feridas vienen siempre en un orden de "trios": despues de las dos primeras feridas, (sangre, i la siguente - ranas), por las kualas resivio Paro advertensias, vino sovre Ejipto la tresera ferida, (piojos), sin ningun avizo.  Ansi fue tambien kon la sejena ferida, (sarna), i la novena ferida, (eskuridad), ke golpearon a los ejipsianos sin dar ningun previo anunsio.

La eksplikasion ke mos dan muestros hahamim es ke el Santo-Bendicho-El manda su avizo a la persona, una i dos vezes, ma no kale de akavidarlo a la tresera vez.  Por lo tanto, el benadam sera kastigado ademas por su falta de atension.

En Devarim (7, 15) meldamos la bendision para el puevlo de Yisrael:
"I kitara Adonay de ti enfermedad; i todas las malas plagas de Ejipto, ke tu konoses, no las pondra sovre ti, sino ke las metera sovre todos los ke te aborresen".
Amen.

La Haftara es Ezechiel 28, 25

- Copyright © sefarad.org - 1997 - 2019

Retour au Site sefarad.org