BLOG - sefarad.org

Parachat Korah (shabbat 23 Sivane 5774, shabbat 21 junio 2014)

MENU

SEFARAD.org
LOS MUESTROS

Annonces
Nos Peines
Nos Joies

‏‪La perasha de KORAH‬
 

En la perasha de Korah meldamos sovre una rebelion kontra Moshe i Aaron.
Esta rebelion fue dirijida por un ombre yamado Korah, tambien del trivo de Levi.
 
La intension de Korah i su grupo fue de sakar a Moshe i Aaron de sus postos komo lideres del puevlo, i remplasarlos.
Esta fue la primera rebelion direkta kontra la autoridad de Moshe.
Varyas fuersas se aunaron por konfrontar frente Moshe, por azer suvir al poder una alternativa.

Naturalmente, ke una rebelion komo esta no krese de nada.
Los komentadores de la Tora tratan de darmos a saver kualos fueron los motivos de esta rebelion kontra Moshe.
 
 
Ribi Avraam Ibn Ezra, i tambien el MALBIM, anotan ke la rebelion desbrocho por kavzo ke se anulo el derecho de los behores (primojenitos ) de servir en el santuvario:  Despues del pekado del bezerro de oro, esta tareha se les dyo a los del trivo de Levi.

Ribi Moshe ben Nahman topa otra razon por la rebelion de Korah i su kompania:
Despues del pekado de los espiones, el kastigo del Dio sovre el puevlo fue muy severo : "En este dezierto kayeran vuestros kuerpos......de edad de vente anyos i arriva, los kuales murmuratesh kontra mi....vozotros no entraresh en la tierra......la kual vozotros despresiatesh".
El razonamiento ke trusho RAMBAN parese muy lojiko:  Los ijos de Yisrael se prepararon por una marcha kurta en el dezierto, i konkistar la tierra prometida en seguida; agora, segun el muevo orden, seran solo los djovenes del puevlo ke terneran el zehut de eredar la tierra de Kenaan.

Korah, Datan, Aviram i todos rebeldes ensaniaron al Dio, i en un milagro espantozo, "avriyo la tierra su boka i los englutyo.....
i  los kuvriyo la tierra".

Al pareser, ke los ke no rekonosen las ovras del Todopoderozo, no se les avren sus ojos, ni se konvenseran, afilu despues de ver provas definitivas, milagros aviertos i klaros:

Ansi, ke al otro dia, se kesharon los ijos de Yisrael kontra Moshe i kontra Aaron, diziendo: "Vozotros matatesh al puevlo de Adonay";
i fue ke kuando se adjuntaron todos kontra Moshe i Aaron, se aparesio una vez mas la onra de Adonay sovre el tavernakolo, i empeso mortaldad grande entre el puevlo. Un kastigo mas por mano del Dio.
        
Kien dara ke muestros lideres, en todos los paizes del mundo, seran yenos de espirito del Dio, kon saviduria i onestidad.
 

Yehuda Hatsvi

 

La Haftara  e Samuel I, 11-12

- Copyright © sefarad.org - 1997 - 2019

Retour au Site sefarad.org