BLOG - sefarad.org

Perasha Bo, Shabbat 4 Chevat 5775, Shabbat 24/1/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de BO


La perasha komensa kon el orden del Dio a Moshe:
"Entra a la prezensia de Paro; porke yo enduresi su korason i el korason de sus siervos, para mostrar entre eyos estos mis senyales".

A kontinuasion meldamos por las feridas i plagas ke trusho el Santo-Bendicho-El  sovre Ejipto, i la evolusion de los evenimientos dramatikos, asta ke Paro –golpeado i vensido-  izo yamar a Moshe i Aaron de noche, i les disho: "Levantadvos, salid de en medio de mi puevlo, vozotros i los ijos de Yisrael, i andad servid a Adonay, komo aviash dicho !".

El Savio Rabi Akiva disho ke "Muestros padres fueron resgatados por zehut de mujeres djustas en akea jenerasion".

En uno de los enkontros de Moshe kon Paro, disho el rey de Ejipto:  "Andad agora vozotros los VARONES (ombres), i servid a Adonay".

No por nada disho Moshe a Paro, firmemente:
"Kon nuestros ninios i kon nuestros viejos andaremos; kon nuestros ijos i kon nuestras IJAS....porke tenemos fiesta a Adonay".

Aki es el lugar de nombrar los rolos ke kumplieron tantas mujeres en akeyos tiempos duros en Ejipto:

Las parteras (komadres), Shifra i Pua, ke rizikaron sus vidas,
ma NO ovedesieron el mando kruel de Paro: "Kuando asistish a las ebreas en sus partos, i verash, si es ijo - matadlo".

Yoheved, la madre de Moshe, ke eskondio a su bebe por tres mezes, i despues lo metio en una arka sovre el rio, kon la konstante vijilensia de Miriam, la ermana grande de Moshe.
Tambien Bitia, la ija de Paro, membrada para bien.
Eya fue la ke sako a Moshe de las aguas i lo engrandesio.

Otra brava mujer era Tsipora, la mujer de Moshe.
Eya parvino salvar a su ijo (ke por una neglijensia de Moshe no fue sirkunsido en su tiempo).

En la proksima semana meldaremos kon bueno en la perasha de Beshalah:
"I Miryam......tomo el pandero en su mano; i todas las MUJERES salieron detras de eya kon panderos i bailes. I Miriam les repondia: "Kantad a Adonay!"

 
La Haftara es Irmiyahu 46, 13-28
 

- Copyright © sefarad.org - 1997 - 2019

Retour au Site sefarad.org