BLOG - sefarad.org

Perasha Beshalah, Shabbat 11 Chevat 5775, shabbat 31/1/2015

MENU

SEFARAD.org
LOS MUESTROS

Annonces
Nos Peines
Nos Joies

 
La perasha de BESHALAH
 
Este Shabat esta dekorado kon el nombre "Shabat Shira"
(Shabat de Kanto). En este Shabat meldamos en la perasha sovre el evento istoriko el kual rekordamos todos los dias en muestras orasiones: "De Ejipto nos redimites, Adonay nuestro Dio, de kaza de siervos nos resgatates; todos sus mayores matates, i tu mayor Yisrael salvates; partites la Mar Ruvia, undiendo a los sobervios; ma, tus keridos pasaron mar".

La perasha mos konta ke muestros padres salieron de Ejipto "kon mano poderoza", ma el Dio enduresio el korason de Paro, rey de Ejipto, i Paro perseguio a los ijos de Yisrael, a la oriya de la mar.
Naturalmente, ke los ijos de Yisrael, apenas liberados de la esklavidad, temieron en gran manera i klamaron a Adonay.
I disho Adonay a Moshe:
"Por ke esklamas a mi? Di a los ijos de Yisrael ke se dirijan
i kaminen; i tu, alsa tu vara i estiende tu mano sovre la mar,
i partela, i entren los ijos de Yisrael por en medio de la mar,
por lo seko".

Muestros hahamim dizen ke uvo una grande ezitasion i miedo entre el puevlo por entrar en la mar.  Entonses un bravo ombre, Nahshon ijo de Aminadav, salto i se echo a las aguas, el primer de todos. En akel momento se korto la mar en dos.


Es kuriozo, ke tambien la perasha de Beshalah esta kortada en dos partes iguales (egzaktamente 58 pesukim kada una).
La segunda parte de la perasha se dedika a kontarmos por los obstakolos ke enkontraron muestros padres en el dezierto.
Afilu despues de ser testiguos a tantos milagros i maravias en Ejipto, fue muy difisil para el puevlo de mantener la kreensia i la feuzia en La Divina Providensia en dias de ambre i sed, i batalias kontra una ofensiva supetania de enemigos (el puevlo malo de Amalek).

El Dio ke mos guadre de todo mal.
 
La Haftara es Jueces 5
 

- Copyright © sefarad.org - 1997 - 2019

Retour au Site sefarad.org