BLOG - sefarad.org

Perasha Tsav, Shabbat 8 Nissan 5715 - Shabbat 28/03/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de TSAV
 
El Shabat ke de antes de Pesah, se yama Shabat a-Gadol (el Grande); parese ke la razon es por ke en la aftara ke se melda este Shabat topamos el pasuk: "Ek, yo enbiyo a vozotros a Eliya el profeta, antes ke venga el dia de Adonay GRANDE i  temerozo...(Malahi 3, 23).

En Shabat a-Gadol se uza en muchos Kales kantar piyutim, dizir un poko de la Hagada, i tambien darsa el rabino por los dinim i las kostumbres de Pesah.

Kon esta tefila tan larga, ke maraviya si lo yamamos Shabat el GRANDE?

En la perasha de esta semana kontunea Moshe a informar al puevlo i a los koanim lo ke enkomenda el Dio sovre los sakrifisios, i el komportamiento de los saserdotes, leyes de limpieza i de santedad, i mas.

Entre los varyos sakrifisios ay tambien el "sakrifisio de paz/pazes", i ansi dize ayi el Pasuk:
"Si lo ayegare/ofresere por agredesimiento, ayegara kon el sakrifisio del agredesimiento tortas sensenias (Matsot) enbueltas en azeite, i bumuelos de sensenias untadas kon azeite".

Dos vezes aparese la palavra "agredesimiento" en este pasuk. Me parese ke  mos kiere azer muy klaro ke lo mas importante aki no es el sakrifisio, ma es el dar grasias al Dio. el Midrash Vayikra Raba dize ke en el futuro, aun ke se van anular los korbanot (sakrifisios)  - el sakrifisio de agredesimiento NO se va anular.

Ke kuriozo ke este pasuk (aun ke no es esta su entysion) mos aze akodrar de Pesah ke esta emen-emen para venir (kon las matsot i los bumuelos...).

En noche de Pesah, SI kon relasion a este pasuk, se kanta en el Kal el mizmor tan lindo (Tehilim 107) : "Loar a Adonay, porke bueno; porke para siempre es su mersed".
De este mizmor ambezamos (segun la Gemara) kien son los ke DEVEN agradeser al Dio: los errados en el dezierto, prizioneros, malatos (hazinos), i marineros.

Ramban mos dize ke kada dia ke bivimos sovre la tierra es yeno de milagros i maraviyas ke no siempre los vemos o mos apersivimos. Por esto, ay de dar grasias al Dio dia por dia;
"En lo ke estamos - bendigamos".
 
                                                           *
La Haftara es Malachie 3

- Copyright © sefarad.org - 1997 - 2019

Retour au Site sefarad.org