BLOG - sefarad.org

Perasha Shemini, Shabbat 29 Nissan 5775, Shabbat 18/04/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de Shemini
              
En la perasha de Shemini meldamos por el akontesimiento trajiko en el kual los dos ijos de Aaron, los saserdotes Nadav
i  Aviu, murieron en el santuvario, kuando salio fuego delante de Adonay, i los kemo.

La Tora no mos konta mas ke los dos koanim "ayegaron delante de Adonay fuego estranio ke El nunka les enkomendo".
Los komentadores de la Tora mos trayen muchas razones i supozisiones ke fue lo ke kavzo a este kastigo tan terivle.
De toda manera entendemos ke lo ke paso era un yerro fatal en el lavor santo, i en la seremonia del santuvario.

A mi me viene natural ke despues de este amargo akontesimiento teniya Moshe de reklamar mas atansion i disiplina "a la punta de la letra".
El pasuk (10, 17) mos konta: "I se enojo/ensanio Moshe kontra Elazar i Itamar los (saserdotes), ijos de Aaron, ke kedaron".
Ma, muestros savios no lo djustifikan a Moshe de ninguna manera ! Eyos dizen ke Moshe, estando kon ravia i  sania, parvino ser yerrado, i no por la primera vez.

Rabbi Elazar (en el livro de Sifri) dize:
En tres lugares se ensanio Moshe i kometio yerros grandes.  El uno, ke es en muestra perasha.
El otro kavzo fue kuando Moshe disho al puevlo: " Oyid agora, rebeldes !  Tenemos de sakarvos agua de esta penya?" (Bamidbar 20,10)
(entonses also Moshe su mano i golpeo la penya kon su vara dos vezes).
En otro lugar (Bamidbar 31,14) "Moshe se ensanio kontra los komandantes del fonsado".

Muestros hahamim dizen ke por estar tan raviozo en akeya situasion, se le olvido a Moshe un fragmento de la Ley, i fue Elazar el saserdote ke avlo a los ombres de la gerra: "Esta es la ordenansa de la Ley ke Adonay enkomendo a Moshe".

Ay i otros kavzos kuando Moshe se ensanio (porke teniya de luchar kontra una indjustisia): uno, en observando a un ejipsiano ke aharvava a un varon ebreo; despues kuando diskutyo Moshe kon un ebreo ke maltratava a otro ("porke aharvas a tu kompaniero?!").
Tambien mos akodramos del kavzo en el kual Moshe se levanto
i ayudo a las ijas de Yitro kontra los pastores (chobanes).

Muestros savios no inyoran las faltas i los defektos de Moshe aun ke "nunka mas se levanto profeta en Yisrael komo Moshe, a kien Adonay konosio kara a kara".

Agora, ke tenemos mozotros, djente del puevlo, sino de kuidar mil vezes mas, i tratar a eskojer bien la karrera derecha.
La Hafatara es Shmuel 1 20 (18-42)
 

- Copyright © sefarad.org - 1997 - 2019

Retour au Site sefarad.org