BLOG - sefarad.org

Parachat Houkat, Shabbat 30 sivan, 28 junio 5774 por Yehuda Hatsvi

MENU

SEFARAD.org
LOS MUESTROS

Annonces
Nos Peines
Nos Joies

La perasha de HUKAT

 

En la perasha de Hukat meldamos komo vinieron los ijos de Yisrael al dezierto de Tsin, "i no uvo agua para la kompania;   i  se adjuntaron kontra Moshe i kontra Aaron, i barrajo el puevlo kontra Moshe:...  porke trushitesh la kompania de Adonay a este dezierto.....ni aun ay agua para bever !"


"I avlo Adonay a Moshe: "Toma la vara, i adjunta a la kompania,  tu i Aaron tu ermano, i AVLAD a la penia/piedra a vista de eyos, i eya (la penia) dara su agua.....   i daras a bever a la kompania".


Los ordenes del Dio fueron muy klaros, i konteniyan todos los komponentes por santifikar i glorifikar el nombre del Dio frente los ijos de Yisrael, los rebeldes.

Siertamente, pudiyan Moshe i Aaron tambien a solas, sakar agua de la penia, i dar agua al puevlo sin adjuntarlos a todos.

Ma no. El Dio avlo en forma klara i absoluta:

"adjunta a la kompania...... AVLAD a la penia/piedra A  VISTA  DE  EYOS".



Aki yegamos a un punto fatal en la vida de Moshe i Aaron.

Meldamos una i dos vezes lo ke mos konta la perasha, i vemos ke en realidad, Moshe no kumpliyo el orden del Dio, aun ke tan klaro i espesifiko !



Muy esranyo, ma esto es lo ke izo Moshe:

"I tomo Moshe la vara de delante de Adonay, komo El  le enkomendo.  I Moshe i Aaron adjuntaron a la kompania delante de la penia/piedra i
Moshe les disho:
"Oyid agora, rebelyadores!  Tenemos de sakarvos/kitarvos agua de esta penia?"


I also Moshe su mano i AHARVO (GOLPEO) la penia kon su vara dos vezes, i salieron muchas aguas, i bevio la kompania i  sus bestias".



El kastigo del Dio, a los dos pastores del puevlo, no tadro de venir:

"I disho Adonay a Moshe i Aaron: Por kuanto no kreitesh en mi, para santifikarme en ojos de los ijos de Yisrael, por tanto, NO TRAYERESH a esta kompania a la tierra ke Yo les di".



Imajinandovos, karos amigos,(siendo ke yo mezmo no tengo la kapasidad de deskrivirlo), kualo es lo ke se konsiente una persona komo Moshe (o Aaron) kon tal kastigo grave del Dio:

"De enfrente veras la tierra, ma no entraras ayi !"



Kuarenta (40 !) anyos de luchas i gerras, penas i sufriensas, por un solo buto:
de trayer a su puevlo a la tierra prometida.

Sera ke por un kurto momento de neglijensia, o de yerro umano, se embarro todo esto komo si no uviera nada?





Los komentadores de la Tora no estan todos en la mezma idea por aklarar la kalidad del pekado de Moshe.

El Rambam, i tambien Avraam Ibn Ezra dizen ke el esensyal del pekado fue la ravia de Moshe.

Rashi, de la otra parte, pensa ke el gran pekado fue por no kumplir kon atansion los ordenes del Dio.

Rabi Yitzhak Abravanel mos traye diez ideas diferentes

(bazandose en Rabi Yosef Albo, RambaN, i otros savios)

porke i deke le reveniya a Moshe este kastigo.

Por egzempio:

1.  Por tener ravia sovre el puevlo, solo por ke se kesharon
(una kesha djustifikada), ke no ay agua para bever.

2.  Moshe ensulto al puevlo, en yamarlos
komo "rebeldes"

3.  Por ke disho Moshe: "TENEMOS de kitarvos agua de esta piedra",  i deviya de dizir: "EL DIO vos va sakar agua de la piedra (penia)."



Al haham Italiano Shmuel David Luzzatto no le gusto la "lista de pekados" ke rekojo Rabi Abravanel; i en su komentario a la Tora eskrive SHaDaL:

"Moshe Rabenu peko UN SOLO PEKADO, i los komentadores kargaron sovre el 13 pekados.

Abravanel mos trusho 10 ideas, despues adjunto i otra una,  i despues vinieron otros i pujaron otras dos ideas i pekados.  Kon esto, desidi yo de abstener i no eskarvar, i no investigar mas, para no "topar", Has veShalom, otro un pekado sovre Moshe Rabenu"...

 

Haftara : Isaie 66

Yehuda Hatsvi


- Copyright © sefarad.org - 1997 - 2019

Retour au Site sefarad.org