BLOG - sefarad.org

Perasha Behar Behukatai, Shabbat 27 Iyar 5775, Shabbat 16/05/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de BEHAR SINAY
 
                                      
La perasha de la semana es una de las mas kurtas ke en la Tora.  Los pokos mandamientos ke mos traye, tokan a la nesesidad de liberarmos, un poko, de muestra tenensia en el materialismo.
 
La primera mitsva es sovre la Shemita, el anyo sabatiko:
"Sesh anyos sembraras tu kampo, i sesh anyos apodaras tu vinya, i akojeras sus frutos; ma en el anyo seteno avra Shabat de olgansa (deskanso) a la tierra, Shabat a Adonay.
 
Entre otras, el benadam tiene en este anyo el tiempo libre de gozar la vida, estudiar, o dedikarse mas a su famiya i a la edukasion de sus ijos.
 
La segunda mitsva mos avla por el anyo del Yovel (jubileo); este es el anyo despues de siete anyos sabatikos: "I santifikaresh el anyo de los sinkuenta, i aprogonaresh alforria (libertad) en la tierra, a todos sus moradores....i tornaresh kada uno a su posesion i a su famiya.
 
En akel anyo de Yovel, todos los esklavos salen liberos; a todos los devdores se renunsia sus devdas, i tambien a la ekspropriasion de sus terrenos, kazas i bienes.
 
La tresera mitsva mos aviza:  "I kuando tu ermano se emprovesera .....tu lo esforsaras............No tomaras de el uzura (interes) ni ganansia; ma temeras a tu Dio, i biva tu ermano kontigo".
 
 
La profonda sinyifikasion de estos tres mandamientos esta bien aklarada en el orden divino (Vayikra 25, 23):
"La tierra no sera vendida a perpetuidad, porke la tierra es MIA".
 
I ansi dize en el pasuk (Vayikra 25, 41):
"Entonses (al jubileo) saldra el sirviente libre.....i tornara a su famiya, i a la posesion de sus padres tornara; porke son MIS siervos, los kuales saki (kiti) Yo de la tierra de Ayifto".
 
El Dio es el patron de la tierra i de lo todo sovre la tierra.
La posesion ke tiene el benadam sovre bienes o sovre sirvientes, es solamente temporaria.
Del mismo punto de vista, el benadam no tiene ninguna apartenensia sovre el tiempo, i ansi ke no tiene el derecho de kovrar dinero (interes i uzura) por el tiempo ke pasa ensima de sus emprestimos a los emprovesidos de la komunidad.
 
El moral prinsipal ke mos ensenya muestra perasha es, ke toda la umanidad tiene el derecho de bivir djuntos en libertad i en bienestar.
 
 

 

 

La perasha de BEHUKOTAY

 


La perasha de Be'hukotai kontiene muchos reproshes, ma empesa kon los pesukim de bendisiones:
"Si anduvieresh en mis ordenansas i guardaresh mis mandamientos.........Yo dare vuestra luvia en su tiempo, i la tierra dara sus produktos, i el arvol del kampo dara su fruto.......i yo dare paz........i la espada no pasara por vuestro paiz".

Kaminando por el dezierto kuarenta anyos, en situasiones de emerjensia, avia ya komo "nesesidad" de milagros i maraviyas (la magna, agua de la piedra, ets.).         ma no ay mijor para el benadam ke mantener una vida simple, trankila i estabilizada. Vida naturala.

Estas bendisiones se pueden yamar "las bendisiones de la ovedensia"; ke en realidad, los dos ultimos pesukim de la perasha de la semana pasada ("Be'ar Sinai") pertenesen a muestra perasha.

Akeyos pesukim mos enkomendan solo esto:
"No agash para vozotros idolos.....mis Shabatot (dias de repozo) guadraresh, i tened en reverensia mi santuvario".

En muestra perasha no se avla por rekompensa i kastigo al individuo: Luvia en su tiempo, abundansia de frutos, i paz en el paiz, son las bendisiones ke dezeamos por el puevlo entero.
Es posivle ke los mandamientos ke se nombraron aki, son leyes del sibur (de toda la komunidad).
Segun la Tora, el bienestar i la felisidad jeneral de muestro puevlo, en su paiz, depende solamente de su komportamiento kolektivo.


Kon esta perasha terminamos el treser livro del humash.
En el livro de Bamidbar ke empesaremos kon bueno al Shabat venidero, vamos a meldar por el kamino largo del puevlo de Yisrael a enkuentro de la tierra prometida. 

HAZAK HAZAK veNIT.HAZAK  ! 

 

 
 
Kedousha di Rosh Hodesh Sivan
 
La Haftara es Irmiyahu 16, 19 I 17

- Copyright © sefarad.org - 1997 - 2019

Retour au Site sefarad.org