BLOG - sefarad.org

Perasha Bealoteha, Shabbat 19 Sivan 5775,Shabbat 6/6/2015

MENU

SEFARAD.org
LOS MUESTROS

Annonces
Nos Peines
Nos Joies

 

 

 

La perasha de BE'AALOTEHA                                                                                        

En la primera parte de la perasha enkontramos muchas kestiones komo las reglas de ensender la almenara en Bet- aMikdash, la santifikasion de los Levitas para servir el servisio de Adonay, las leyes de "Pesah Segundo" en el mez de Iyar, i mas.

En la segunda parte de esta perasha meldamos ke el puevlo se kesho a oyidos de Adonay, i por lo tanto fue kastigado por mano del Dio.  Moshe, el lider del puevlo, yego kon esto a un estado de dezesperasion i inkapasidad. Es aki ke disho el Dio a Moshe:
- "Reuneme setenta varones de Yisrael........i traelos a la puerta del tabernakolo de reunion.........i YO desendere i avlare ayi kontigo; i tomare del espirito ke esta en ti,    i pondre en eyos; i yevaran kontigo la karga del puevlo, i no la yevaras tu solo".

(Meustros hahamim dizen, ke bazandosen a este akto divino, se formo despues de muchas jenerasiones el Sanhedrin, el instituto supremo del puevlo).

La Tora mos konta ke aparte de los setenta ombres, de los viejos del puevlo, kedaron al derredor de la tienda i dos ombres non kombidados, ke el espirito repozo sovre eyos, i empesaron eyos a profetizar tambien.
I korrio un djoven (ke el Midrash dize ke era Gershom, el ijo de Moshe), i dyo avizo a Moshe. En esto, Yeoshua ijo de Nun, demando de impedirlos a los non kombidados.
Ma Moshe le respondio: "Tienes tu zelo por mi?!   ma kien dara ke todo el puevlo de Adonay fueran profetas !".

Aki vemos a tanto Moshe era umilde i modesto, ke la utilidad del puevlo fue su uniko interes.
La umildad de Moshe se nota ayinda mas en un otro kavzo relatado en la perasha:
Miriam avlo kontra Moshe por kavza de la mujer kushita ke avia tomado.                   
El kastigo del Dio no tadro, i Miriam estava leproza. En akel mismo momento, Moshe, umilde i djenerozo, klamo al Dio, rogando ke la sane a Miriam.

Entre las dos partes de la perasha, aparesen dos pesukim (Bamidbar 10, 35-36) ke asta oy, a muestra kostumbre sefaradi akompanian el Sefer Tora en saliendo del Ehal.
Estos dos pesukim a la punta del kapitolo, estan (komo si en un parantez), entre dos letras ebreas inversas (en forma de la letra "Nun").


Muchos perushim se dieron al kontenido de los dos pesukim, i  a estos dos sinyos muy raros.
Me plaze mas la eksplikasion kabalistika del Zohar ke dize ke se avla aya por la Shehina (Divinidad) ke nunka abandonara al puevlo de Yisrael; la forma de las dos letras inversas simboliza ansi komo observa i guadra la madre gazela a su kriatura, i komo se miran ambos de parte a parte.

 

1a Haftara es Zakharia 2, 14-3

 

- Copyright © sefarad.org - 1997 - 2019

Retour au Site sefarad.org