BLOG - sefarad.org

Perasha Shelah Leha, shabbat 26 Sivane 5775, shabbat 13/6/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de SHELAH LEHA
 
 
En la perasha de Shelah Leha, ansi tambien en la aftara (Yehoshua 2) enkontramos uno de los ofisios mas antiguos: el espionaje.

Muestra perasha (komo tambien la aftara), mos konta ke los ijos de Yisrael arrivaron a la frontiera de la tierra prometida por konkistarla.
Mos viene muy lojiko a pensar ke antes de salir a kualker gerra o batalia ay nesesidad de mirar a ver i tomar en kuenta la pozision del enemigo, su fuersa, sus puntos de debilidad, ets.
Entonses, Moshe eskojo los mejores ombres para esta tarea i los enbiyo ke espiyen la tierra de Kenaan.

Si tornamos por un momento a meldar un pasuk (en Shemot 3, 17)                                                                  vemos aya la prometa del Dio a los ijos de Yisrael: "Vos are suvir de la afriision de Ayifto a la tierra del Kananeo.......a una tierra ke mana leche i miel".

Los espiones no niegaron ke de sierto la tierra mana leche i miel, ma al mismo tiempo disheron ke el puevlo ke mora aya es fuerte, "i no podremos suvir kontra akel puevlo, porke es mas fuerte de nozotros".

El reporte negativo de los espiones kavzo un golpe enorme en el moral del puevlo.
Meldamos en la perasha: "I toda la kompaniya grito i dyo bozes, i el puevlo yoro akea noche".                 
La desesperasion fue tan amarga asta ke disheron:
"Agamos un kapitan i tornemos a Ayifto !"

El pekado del puevlo fue muy grande (komo ansi dize el salmo de Tehilim 106:
"Aborresieron la tierra dezeavle, no kreyeron en Su palavra");    i  disho Adonay a Moshe: "Asta kuando me ensanyaran este puevlo?......asta kuando no kreeran kon todos los senyales ke ize en medio de eyos?  los erire de mortaldad, i los destruire !!

Moshe, komo siempre, komo pastor fiel, empeso sus rogativas delante del Dio para ke perdone a su puevlo. 
Uno de los argumentos ke dyo Moshe, fue:                     "Ma lo oyiran los edjisyanos.... ke as echo morir a este puevlo...i las djentes avlaran, diziendo: por kuanto no pudo Adonay meter este puevlo en la tierra de la kual les aviya djurado, los mato en el dezierto".

Ribi Yitzhak Arama en su livro "Akedat Yitzhak" dize kategorikamente:                                                                              "Ke diziran los edjisyanos" - no es argumento !! Sera ke por los idiotas, no azera el Dio la propia djustisia?"

Don Yitzhak Abravanel tiene i el una kritika sovre Moshe por dar un argumento tan absurdo: "El Dio es el patron del mundo, no es deltodo posivle ke por kavzo de "ke diran las djentes" no aga djuzgo korrekto".


De la otra parte mos ensenya Ribi Yohanan, (en Masehet Megila del Talmud), ke aunke "Adonay vuestro Dio es Dio de los diozes, i senyor de los senyores" (Devarim 10, 17), EL es tambien -a kontunear del mismo pasuk-  "el ke aze djustisia al guerfano, i a la bivda, i ke ama al estraniero".

Dunke, el Dio Todopoderozo, a tanto lesho i alto i infinito, tiene afekto por el mundo ke kreo, i tiene "interes" ke su nombre sera santifikado en este mundo, ansi ke kada ovra divina o umana sera echa por santifikar su nombre grande.

El fato es, ke el Dio respondio a la rogativa de Moshe: "Yo perdoni segun tu palavra".
 
 
La Haftara es Josue 2

- Copyright © sefarad.org - 1997 - 2019

Retour au Site sefarad.org