BLOG - sefarad.org

Perasha Ekev, Shabbat 22 Av 5775, Shabbat 8/8/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de EKEV
 
                                                     עקב       
 
Antes de entrar a la tierra prometida, paiz de lecha i miel, Moshe enkomenda al puevlo de Yisrael: "I komeras, i te artaras, i bendiziras a Adonay tu Dio por la buena tierra ke te dyo".
 
A baza de este Pasuk mos enseniaron muestros savios de dezir la Birkat Mazon despues de komer.
 
Ma, Moshe mos deskurve kual es su miedo:
"No sea ke te olvides de tu Dio.....no sea ke komas i te artes,       i fraguas kazas buenas.....i plata i oro te se multipliken.....i tu korason se enalteska, i te olvides de tu Dio ke te sako de kaza de servidumbre"...
 
Moshe konose el karakter del "nouveau riche", akel prove, mizeravle, ke de pronto se levanto del estierkol, i se izo patron de bienes. En esta mueva pozision, en muchos kavzos, krese la tendensia de niegar su pasado, i a vezes de olvidar a todos los ke le ayudaron a yegar i alkansar su bienestar i su rikeza.
 
                        ***
En esta perasha, mos dize Moshe Rabenu: "I agora, Yisrael, ?ke demanda Adonay tu Dio de ti, SINO ke temas a Adonay tu Dio, ke andes en todos sus kaminos, i ke lo ames, i sirvas a Adonay tu Dio kon todo tu korason, i kon toda tu alma".
 
Rabi Yosef Albo en su livro "Sefer ha-Ikarim" dize, ke en la manera ke esta eskrito el pasuk, parese komo si fuera una koza muy liviana i muy fasil por azerla.
 
En realidad, por kualker persona, es un lavoro "grizo" de dia por dia i de paso a paso: azer echas buenas, kumplir mitsvot  i andar al kamino de la Tora.  En kurto, tener la aspirasion de ser, a lo mas posivle, persona kumplida.
 
En esto, el RAMBAN mos apunta al pasuk ke en seguida, el kual dize:
"Ke guardes las enkomendansas de Adonay ke yo te enkomnedo oy, POR TU BIEN".
Kere dizir, ke kuando mos damos kuenta ke todos los mandamientos son por muestro propio bien, mos sera todo fasil, i koza no tan difisil por kumplir.
 
 
La Haftara es Ishaya ‘9,14 ;50

- Copyright © sefarad.org - 1997 - 2019

Retour au Site sefarad.org