BLOG - sefarad.org

Perasha Ree, Shabbat 30 Av 5775, Shabbat 15/8/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de RE'E
 
Rosh Hodesh Eloul
          
Las tres ultimas perashot (Devarim, Va'ethanan i Ekev), eran komo "prefasio" a la perasha de esta semana. Despues de azer akodrar al puevlo el pasado desde la salida de Ayifto, agora viene Moshe kon una sira de Mitsvot i komandamientos, komo, por egzempio, los dinim de Kasherut i mas i mas.

Ma, antes de todo empesa Moshe kon un sujeto ke me parese ser filozofiko.                                                                           Ansi disho Moshe:
"MIRA, yo meto/pongo oy delantre de vozotros bendision i maldision; bendision si oyeresh a las enkomendansas......i maldision si vos apartaresh del kamino ke yo vos enkomendi oy, para andar detras de otros diozes".

La posibilidad de apartar, de eskojer i desidir kontunea tambien
en otra perasha, diziendo:
"Yo pozi (meti) delante de ti la vida i la muerte, la bendision i la maldision; eskoje pues la vida, para ke bivas tu i tu semen" (Devarim 30, 19).

Es enteresante de notar ke aun ke estas palavras fueron apuntadas a todo el puevlo, empesan kon el biervo MIRA,  en singular. Esto mos ambeza ke esta es kestion de kada persona. Kada uno i uno deve azer su "heshbon", i de saver kaminar kon kalkolo en derechura.

Me parese entender ke la Tora mos indika aki la idea de LIBRE ELEKSION.

Ma la idea no esta en si totalmente klara:
Es ke la persona es kapas de trokar i formar su mundo i su vida segun kiere, o sera ke todo ya esta eskrito i firmado, i todos mozotros djgugamos aki solamente komo "marionettas" ?

El  Rambam es el reprezentate mas evidente de la idea de "libre eleksion".  El dize ke esta idea es el primo valor umano, el valor ke aze la diferensia entre el benadam i la beema.

[ El filozofo aleman Emanuel Kant (1724-1804) se dediko en una manera imensa a estabilizar esta teoria, i por konvenser al mundo ke esta idea es la unika verdadera o posivle ].
 
Ma, no todos muestros hahamim i savios estan de akodro kon esta idea. La razon es por ke kontiene en si un poko de kontradision.

Absolutamente por ser kreyentes ke el Dio save todo-por-todo por adelantado, no podian akseptar, (estos siertos hahamim), a la idea ke la persona puede tener la posibilidad de trokar su kamino, i ansi trokar - a vezes- no solo el prezente, ma tambien, tal vez, el futuro.

Komo es posivle?

Me parese, ke la repuesta mas klara ya mos fue dada en el siglo segundo por Ribi Akiva Ben Yosef:
"Todo esta (del Senyor) previsto, i la libre lisensia (permision) es dada; i kon bien el mundo es djuzgado, i lo todo asegun la mayor parte de las ovras"   (Pirke Avot 3, 15).
 
 
La Haftara es Ishaya 54, 11+18 (1)5)

 
                                                           

- Copyright © sefarad.org - 1997 - 2019

Retour au Site sefarad.org