BLOG - sefarad.org

Perasha Ki Tetse, Shabbat 14 Elul 5775, Shabbat 29/8/2015

MENU

SEFARAD.org
LOS MUESTROS

Annonces
Nos Peines
Nos Joies

 
 
La perasha de KI TETSE
 
 
En la perasha de Ki-Tetse, komo tambien en la perasha de la semana pasada (Shoftim), ay unas kuantas leyes de komportamiento en la gerra, tratando, a lo tanto posivle, de segir ser umano. Es muy impresionante de observar estas leyes ke se dieron a muestro puevlo mas de 3000 anyos antes del Pakto de Geneva...

De la otra parte, los ultimos pesukim de la perasha son muy firmes i definitivos:

"Akodrate de lo ke te izo Amalek kuando salites de Ayifto; de komo te salio al enkuentro en el kamino, i te korto todos los flakos detras de ti, kuando tu estavas kansado i fatigado; i no tuvo (Amalek) ningun temor del Dio".

Parese ke la Tora konose bien el karakter de muestro puevelo, de "dar de pasada", de olvidar akontesimientos importantes, en lugar de tomarlos en kuenta i ambezar la lision por jenerasyones.
Mos olvidamos los favores de muestros amigos, ma tambien tenemos la tendensia de olvidar el mal ke mos izieron muestros enemigos.

El puevlo de Yisrael vensyo la gerra kontra Amalek en el dezierto. Entonses por ke ay ainda de guardar enojo i ostilidad?
Una de las razones, segun kiero opinar, es porke Amalek ovligo i forso a los ijos de Yisrael de tomar armas en las manos para defendersen; los izo salir a la batalia i "partisipar" en las matansas.
La gerra, aun defensiva, aun viktorioza, es siempre amarga, i  mos kovra un presio muy karo.
El ideal de muestro puevlo es la paz.

Amalek komo un puevlo espesifiko ya no egziste mas. Ma "amalek" es tal vez kualker grupo de djente kruel "ke no tiene ningun temor del Dio".

"No te olvides" es la ultima fraza de esta perasha.
 
La Haftara es Ishaya 54, 1-10
                                   

- Copyright © sefarad.org - 1997 - 2019

Retour au Site sefarad.org