BLOG - sefarad.org

Perasha Ki Tavo, Shabbat 21 Eloul 5775, Shabbat 5/09/2015

MENU

SEFARAD.org
LOS MUESTROS

Annonces
Nos Peines
Nos Joies

La perasha de KI-TAVO
 
 
Una parte muy prinsipal en la perasha de Ki-Tavo es la komparasion ke mos trae entre dos fragmentos.
El uno empesa kon el avizo: "I sera ke si oyir oyeres a la boz de Adonay tu Dio", i mos promete un monton de bendisiones.
El otro fragmento empesa kon el Pasuk: "I sera ke si NO oyeres a la boz de Adonay".......i kontunea en dando una lista larga de maldisiones.
Malorozamente, muchas de estas maldisiones se realizaron en la estoria de muestro puevlo.
Es bastante difisil de oyir este fragmento de la perasha kon todas akeas maldisiones; entonses, muestra kostumbre es de meldar esta parte de la perasha kon boz basha.
 
No es por la primera vez, ni la ultima, ke mos trae la Tora un pararelismo entre maldision i bendision.
En la perasha de Re'e (Devarim 11,26) meldamos:
"Mira, yo pongo oy delante de vozotros la bendision i la maldision.                 La bendision, si ovedeseresh a los mandamientos de Adonay", etc.
 
En la perasha de Nitsavim (Devarim 30,19) vemos repetision en una forma semejante:
"yo pozi delante de ti la vida i la muerte, la bendision i la maldision;         eskoje, pues, la vida, para ke bivas tu i tu semen".
 
De estos tres avizos, i otros mas en la Biblia, se nota komo si el benadam tiene en su mano la validez de desidir en ke kamino andar; al kamino bueno, o has ve-shalom al malo.  
Esta desizion, ke la yamamos "libre eleksion", es komo union de sentimiento    i pensamiento de kada persona por si mismo. Del reproshe de Moshe al puevlo, se puede entender ke afilu milagros aviertos i klaros no siempre tienen influensia sovre la desizion personal:
 
"I yamo Moshe a todo Yisrael, i les disho: Vozotros vitesh todo lo ke Adonay izo delante de vuestros ojos en Ayifto.......las  grandes prevas ke vieron tus ojos, las senyales, i las grandes maraviyas. Empero, asta oy, Adonay no vos dyo korason para saver (entender), ni ojos para ver, ni oyidos para oyir !"
 
Siertos komentadores de la Tora se demandaron ke sinyifika esto lo ke disho Moshe en su reproshe?
Ke si era ansi, ke el Kriador izo todos estos milagros ma no mos regalo kon "korason para entender, ni ojos.....ni oyidos", ande esta entonses la "libre eleksion" del benadam?
 
Naturalmente, de si se entiende, ke Moshe diziluzionado del komporto malo de puevlo, avlo aki del fondo de su korason, kon un tono de ironia.
 
El MALBIM mos da su opinion en sitando de Daniel (2,21):
"El Dio da saviduria a los savios, i sensia a los ke saven entendimiento"
 
MALBIM, (Ribi Meir Yehuda Leib), dize ke la persona alkansa la saviduria solamente a una de las tres siguentes kondisiones:
1. si se esperta por si mismo i la prokura ("korason para saver")
2. si se esperta a ver kozas ke no vido de antes ("ojos para ver") 
3. al menos, en konfiando a la tradision de sus antepasados
    ("oyidos para oyir").
 
En la aftara de la semana, Yeshayau el profeta (en kapitolo 60)  trae su profesia de konsuelo sovre la nasion judia:
"Levantate, alumbra, porke vino tu luz, i la onra de Adonay esklaresio sovre ti. Tinievlas kuvriran la tierra i eskuridad las nasiones. Ma sovre ti amanesera Adonay, i sovre ti sera vista su gloria; i andaran las nasiones a tu luz".
 
Makare, perkuremos todos mozotros yegar a la aspirasion de muestro puevlo de ser "Or la-Goyim", "luz de las nasiones" (Yeshayau 42, 6).
 
 
La Haftara es Yeshayau 60, 1--22 
 
 

- Copyright © sefarad.org - 1997 - 2019

Retour au Site sefarad.org