BLOG - sefarad.org

Parachat Pinhas, shabbat 14 Tamouz 5774, 12/7/2014 por Yehuda Hatsvi

MENU

SEFARAD.org
LOS MUESTROS

Annonces
Nos Peines
Nos Joies

La perasha de PINHAS

En la perasha pasada ("Balak") ya meldimos komo el puevlo empeso a eskarar kon las ijas de Moav, i se enkorvaron a sus diozes; i la folor de Adonay se ensendio kontra Yisrael.
Pronto yego el kastigo de los sielos, i desbrocho una mortaldad en la kual murieron vente i kuatro mil del puevlo.
 
En todo esto, Pinhas, el ijo de Elazar, ijo del Aaron el saserdote, vido a un varon, uno de los mayorales de Yisrael, kon una Midyanita, ke tuvo el tupe de venir djuntos kon eya serka a la puerta de la tienda del plazo (Oel Moed).
Pinhas, entonses, kon su aire de zelo, tomo una lansa en su mano  i mato a ambos eyos.
 
En muestra perasha, dize el Dio a Moshe:
"Pinhas el saserdote a echo tornar mi sanya de sovre los ijos de Yisrael, i no konsumi al puevlo kon mi zelo. Por tanto, Yo le do mi firmamiento de paz, i tendra el i su semen detras de el, el firmamiento de saserdote por siempre".
 
Pinhas, izo lo ke izo sin konsultarse kon Moshe; ya ke esta echo, el Dio konfirmo su akto.
Ma, muestros hahamim dizen ke en las palavras del Dio ay una klara indikasion ke en jeneral, el kamino derecho i bueno es "el firmamiento de paz" i no atakes espontaneos de zelo.
 
Aki, en la perasha de Pinhas meldamos mas ke Moshe roga al Dio ke ordene varon sovre el puevlo, un lider dinyo, "i no sea el puevlo de Adonay komo ovejas ke no tienen pastor". 
  
I disho Adonay a Moshe:                                                                                          
Tomate a Yeoshua, ijo de Nun, varon en el kual ay espirito,  i pondras tu mano sovre el".
 
Por primera vez en la Tora topamos el biervo "pastor" por deskrivir un lider del puevlo.
De aki vemos tambien, ke Pinhas el ekstremista (aun ke kon su puro korason de idealismo), no fue elejido a giar al puevlo komo pastor fiel. El pastor tiene de ser persona kon sano djuisyo i ekilibro de espirito.
 
Entonses, Yeoshua (i no Pinhas) el es ke fue eskojido por estar a la kavesera del puevlo i konkistar a la tierra prometida.
 

Yehuda Hatsvi

 
La Haftara es Reyes1; 22
                                               
           

- Copyright © sefarad.org - 1997 - 2019

Retour au Site sefarad.org