BLOG - sefarad.org

Parachat Masei, Shabbat 28 Tamuz 5774, Shabbat 26/7/2014

MENU

SEFARAD.org
LOS MUESTROS

Annonces
Nos Peines
Nos Joies

                                                                                                                                                                             

 

La Perasha de MASEI

 

En "Masei" meldamos sovre las 42 movidas de los ijos de Yisrael en el dezierto desde la salidura de Ayifto asta ke yegaron a las yanuras de Moav djunto al rio de Yarden.

Los komentadores de la Tora, kada uno kon su estilo, provan de eksplikar por ke mos traye el eskrito todos estos detalyos de las movidas.
Rabi Moshe Darshan dize, ke de aki se nota la piadad del Dio sovre su puevlo:
La mayor pena del kamino en el dezierto fue en el primer anyo i en el ultimo anyo; ma, lo mas de los 40 anyos pasaron durante una kaminada bien organizada i avagaroza, kon muchas estasiones por deskanso.

De la otra parte dize RAMBAM, (en su livro More-Nevuhim),  ke el punto de la nesesidad de nombrar todos los kaminos ande pasaron los ijos de Yisrael, es grande:
Todos los milagros i maraviyas ke izo el Dio a su puevlo terneran influensia imensa sovre la jenerasion ke vido todo esto. Ma, en otras jenerasiones, puede alevantarse alguna duda, asumando ke tal vez bivyo el puevlo durante 40 anyos en algun oazis, o serka de alguna sivdad. Entonses, por evitar kualkier duda, vino la Tora i mos dyo detalyos de todas las movidas de los ijos de Yisrael en el dezierto.

Me parese ke solo pensar en la logistika komplikada enbuelta en mantener miles i miles de djente en el dezierto, ya mos aze kreer en akel largo kamino komo un kontinuo de nisim/milagros.
Indemas, me demando yo, si no se indika en esta perasha el destino de muestro puevlo, moverse durante siglos entre Babilonia, Roma, Espania, i en otras muchas "estasiones" en el mundo entero...

 

 

La Haftara es Irmiyahu 2,4

 

- Copyright © sefarad.org - 1997 - 2019

Retour au Site sefarad.org